ڕووسیا هەوڵدەدات جەنگی ژیریی دەستكرد لە ئەمریكا بباتەوە

ئاڤا نیوز

 

حكومەتی ڕووسیا كار بۆ ئەوە دەكات ژیری دەستكرد ببێتە سەرچاوەیەكی گرنگی داهات و تا ساڵی 2030، بڕی 110 ملیار دۆلار داهاتی پێ پەیدا بكات.

 

وێنە گەورەكە: سەرەڕای ئەوەی ئەمریكا توانیویەتی پارێزگاری لە پێشەنگبوونی لە بواری ژیریی دەستكرد بكات، ڕووسیا ڕژدە لەسەر ئەوەی لە ڕكابەری ئەمریكا دانەبڕێت و كاریش بۆ وەرگرتنی ڕابەرایەتی ئەو بوارە دەكات.

 

هۆكارە زانراوەكان: سزا ئابوورییەكانی ئەمریكا و ڕۆژئاوا بۆ سەر مۆسكۆ بەهۆی جەنگی ئۆكراینا، بارگرانی لەسەر ئەو وڵاتە دروستكردووە، بۆیە حكومەتی ڕووسیا كار بۆ ئەوە دەكات لەڕێگەی دیكەوە قەرەبووی ئەو زیانە ئابوورییانە بكاتەوە بەهەماهەنگی لەگەڵ هاوبەشەكانی، دیارترینیان وڵاتی چین.

 

ئەوەی لەبارەیەوە دەوترێت: ڕاپۆرتێكی زانكۆی ستانفۆردی ئەمریكی ئاشكرای دەكات، ژیریی دەستكرد لە چەند بوارێكدا تەنانەت پێش توانای مرۆڤیش كەوتۆتەوە بەتایبەت لە زیادكردنی بەرهەمی كارگە پیشەسازییەكان و باشكردنی كوالێتی بەرهەم لە ناوەندەكانی بەرهەمهێنان، ڕۆڵی ژیریی دەستكرد لە گەشەپێدانی ئابووری بەشێك لە وڵاتانی پێشكەوتوو گەیشتووەتە 60%.

ئەوەی پێشبینی دەكرێت: زانكۆی ستانفۆرد پێشبینی دەكات قەبارەی بەشداریی ژیریی دەستكرد لە ئاڵووگۆڕی ئابووری جیهان گەیشتبێتە 400 ملیار دۆلار و پشكی شێری ئەو بڕە پارەیەش لەلایەن ئەمریكاوە كۆنتڕۆڵ كراوە، بەوپێیەی زۆربەی ئەو كۆمپانیایانەی لە بواری ژیریی دەستكرد كاردەكەن، ئەمریكین.

 

چی ڕوودەدات: ڕووسیا لەڕێگەی كۆمپانیای 'سپێر' سیستمی (گێگاچات)ـی بۆ كارگێڕیی گشتی خستە بازاڕەوە، هاوكات كۆمپانیای 'یاندێكس' كە بەناوبانگترین کۆمپانیای تەکنەلۆژیی ڕووسیایە، نەوەی چوارەمی یاندێکس جی پی تی خستە بازاڕەوە، لە هەمان کاتدا کۆمپانیاکانی هاوشێوەی T-Bank و MTS و VK هەنگاوەکانی پەرەپێدانی تۆڕە دەمارییە دەستکردەکانییان ناوە.

زانیاریی زیاتر: لە بواری گواستنەوەشدا، تاقیکردنەوەی تراکتۆرەکانی لێخوڕینی تۆماتیكی لەسەر ڕێگای مۆسکۆ- سانت پترسبۆرگ دەستیپێکرد، بە بەکارهێنانی سیستمی مۆدێلکردنی سێ ڕەهەندی کە بە زیرەکیی دەستکرد پەرەی پێدراوە بۆ دیزاینکردنی پارچەی ئامێرەکان، هەموو ئەوانە و پڕۆگرامی دیكەش لەچوارچێوەی پلانێكی گشتگیری حكومەتی مۆسكۆیە بۆ پەرەپێدانی 'ئەی ئای' لە بوارەكانی تەندروستی، پیشەسازی، گواستنەوە و كارگێڕی گشتی بەجۆرێك پێشبینی دەکرێت تاوەكو ساڵی 2030 قەبارەی بەشداریكردنی ژیریی دەستكرد لە گەشەی ئابووری ڕووسیا بگاتە 110 ملیار دۆلار.