کوردستان لەبارەی هەناردەکردنەوەی نەوت دوو مەرجی بۆ عێراق هەیە

ئاڤا نیوز

شاندی دانوستانکاری هەرێمی کوردستان ڕایگەیاند، بۆ یەکلاییکردنەوەی پشکی ڕاستەقینەی نەوت بۆ پێداویستی ناوخۆی کوردستان و چۆنیەتی پێدانی شایستە داراییەکان بە کۆمپانیاکانی نەوت چاوەڕێی کۆتا وەڵامی بەغدان، دواتریش لە زووترین کاتدا هەناردەی نەوت دەستپێدەکاتەوە.

چیرۆکی سەرەکی: ئێوارەی ئەمڕۆ وەزارەتی نەوتی عێراق ڕایگەیاند، ڕێکارەکان بۆ دووبارە هەناردەکردنەوەی نەوتی هەرێمی کوردستان تەواوبوون، بۆیە داوا لە حکومەتی هەرێمی کوردستان دەکات نەوت ڕادەستی کۆمپانیای سۆمۆ بکات بەمەبەستی هەناردەکردنی لەڕێگەی بەندەری جەیهانەوە.

ڕاگەیێنراوی فەرمی: لە وەڵامی ڕاگەیێنراوەکەی وەزارەتی نەوتی عێراق، شاندی دانوستانکاری حکومەتی هەرێمی کوردستان ئاشکرایکرد کە 18ـی ئەم مانگە لە کۆبوونەوەیاندا لەگەڵ وەزارەتی نەوتی فیدڕاڵ کە لە هەولێر بەڕێوەچوو، جەختیانکردووەتەوە کە پێش جێبەجێکردنی هەمواری یاسای بودجە، گرنگە ڕێککەوتن بکرێت لەسەر بڕی نەوتی تەرخانکراو بۆ پێداویستی ناوخۆ بەگوێرەی پێداویستی ڕاستەقینەی هەرێمی کوردستان و پابەندییەکانی هاوشێوەی ناوچەکانی دیکەی عێراق.

لە وەڵامی داواکارییەکەی شاندی دانوستانکاری هەرێمی کوردستان، شاندی وەزارەتی نەوتی فیدڕاڵ ئاماژەی بەوەکردووە، ئەم بابەتە پێویستی بە ڕەزامەندی سەرۆکوەزیرانی فیدڕاڵی هەیە.

دووەم داواکاری شاندی دانوستانکاری حکومەتی هەرێمی کوردستان پێش دەستپێکردنەوەی هەناردەی نەوت، ئەوە بووە پێویستە ڕێککەوتن بکرێت لەسەر ڕێکاری دیاریکراو و ڕوون بۆ چۆنیەتی دانەوەی شایستە داراییەکانی کۆمپانیاکانی تایبەت بە بەرهەمهێنان و گواستنەوەی نەوتی هەرێمی کوردستان هەروەکو لە یاسا و بەوردەکارییەوە لە کۆبوونەوەکاندا لەگەڵ وەزارەتی نەوت خراونەتەڕوو.

لە وەڵامی ئەم داواکارییەی شاندی دانوستانکاری هەرێمی کوردستانیش، شاندی وەزارەتی نەوتی فیدڕاڵ باسیان لەوەکردووە، ئەم بابەتە پەیوەندی بە وەزارەتی داراییەوە هەیە و دەبێت لەگەڵ ئەواندا گفتوگۆی لەسەر بکەن.

شاندی دانوستانکاری حکومەتی هەرێمی کوردستان جەختیش دەکاتەوە گرنگە لە یەکلاییکردنەوەی ئەو بابەتانەدا پەلە بکرێت و ڕەزامەندی لایەنە فیدڕاڵییەکانیان بۆ وەربگیرێت، لە بەرامبەریشدا حکومەتی هەرێمی کوردستان ئامادەیە بۆ دووبارە دەستپێکردنەوەی هەناردەی نەوت لە ڕێگەی بە کۆمپانیای سۆمۆ و دانانی داهاتەکەی لە خەزێنەی فیدڕاڵی و زیادکردنی داهاتەکان بۆ بەرژەوەندی گشتی.