ئەمریکا هۆشداری لە پچڕاندنی ئینتەرنێتی ستارلینک دەدات لە ئۆکراینا

ئاڤا نیوز

 

ئەمریکا فشارەکانی بۆ سەر ئۆکراینا چڕکردووەتەوە بە ئامانجی هێنانەکایەی ڕێککەوتنێک کە بە خواستی ئەمریکا بێت، لە تازەترین هەنگاویشدا هۆشداریداوە لە پچڕاندنی ئینتەنێتی ستارلینک لەو وڵاتە. 

 

وێنە گەورەکە: دانووستانکارانی ئەمریکا تا دێت فشارەکانیان بۆ سەر ئۆکراینا زیاتر دەکەن، ئامانجیش لەو فشارانە ڕازیکردنی زێلێنسکییە بەوەی واژۆ لەسەر ڕێککەوتنێک بکات کە نیوەی ئەو کانزا دەگمەنانەی کە لە ژێر خاکی ئۆکرانیا دا هەن بۆ ئەمریکا بێت، بەڵام تاوەکو ئێستا وڵاتەکە بەو جۆرە ڕێککەوتن و پێشنیازە ڕازی نییە. 

 

ئەوەی لەبارەیەوە دەگوترێت: سەرۆکی ئێستا ئەمریکا دەیەوێت لە ڕێگەی بڕینی ئینتەرنێتی ستارلینکەوە فشارەکانی بۆ سەر ئۆکراینا زیاتر بکات کە ئیلۆن مەسک، گەورە ملیاری ئەمریکی و وەزیری کاری کابینەکەی ترەمپ خاوەندارییەتی دەکات. 

 

لەلایەکی دیکەوە: خاوەنی خزمەتگوزاری ستارلیک، هەموو ئەو دەنگۆیانە ڕەتکردووەتەوە کە باس لە پچڕاندنی خزمەتگوزارییەکانیان دەکات لە ئۆکرانیا و بە پڕوپاگەندە ناوزەندی دەکات. 

 

زانیاریی بەدەستهاتوو: بەرپرسێکی ئۆکرانیا ڕایگەیاندووە، ئێستا وەڵاتەکەمان بەدوای شوێنگەرەوەیەکدا دەگەرێت تاوەکو لە ئەگەری هەر پێشهاتێک ڕووبەڕووی گرفت نەبینەوە و دەستمان بگات بە خزمەتگوزاریی ئینەرنێت. 

 

قووڵتر: لەبەرامبەر پێشکەشکردنی ئەو هاوکارییە سەربازی و ماددیانەی کە ئەمریکا پێشکەشی بە ئۆکرانیای کردووە داوای بەشێک لە داهاتی سامانە سرووشتییەکانی ئەو وڵاتەی کردووە، بەڵام  ماوەیەکە ناکۆکییەک دروستبووە لە نێوان ئەو دوو وڵاتە. 

 

پێدراوە ڕاستییەکان: نزیکەی 5% سەرچاوە کانزاییەکانی جیهان لە  ئۆکرانیادایە، وڵاتەکە دەوڵەمەندە بە نەوت و کانزاکانی  تیتانیۆم، یۆرانیۆم، ئاسن، مەنگەنیز و لیتیۆم، هەروەها چەندین کانزای دیکەی دەگمەنی هەیە کە ئەمەش وادەکات بۆ ئاسایشی نیشتمانی ئەمەریکا، گرنگ بێت و چاویان لەم کانزایانە بێت.