مەسرور بارزانی: هاوشێوەی ژاپۆن لەڕێگەی سیستمی خوێندن نەوەیەكی پابەند و بەرهەمهێنەر پێدەگەیەنین

ئاڤا نیوز

سەرۆكوەزیران مەسرور بارزانی لە گفتوگۆی لەگەڵ شاندێكی ژاپۆنی، پێشنیار دەكات سوود لە ئەزموون و سیستمی خوێندن و پەروەردەی ژاپۆن بۆ هەرێمی كوردستان وەربگرن بەمەبەستی پێگەیاندنی نەوەیەكی پابەند، بەرپرسیار، بەرهەمهێنەر و داهێنەر.

چیرۆكی سەرەكی: ئەمڕۆ یەکشەممە، سەرۆكوەزیران مەسرور بارزانی، پێشوازى له شاندێکی ئاژانسی هاریکاریی نێودەوڵەتیی ژاپۆنی 'جایكا' بەسەرۆکایەتی هێرۆشی سوزوکی، بەڕێوەبەری نووسینگەی جایکا لە عێراق کرد و لە دیدارێكدا گفتوگۆ لەبارەی پەرەپێدانی هاریكاری و هەماهەنگی نێوان هەردوولا لەبواری خوێندن و پەروەردە كرا.

ڕاگەیێنراوی فەرمی: سەرۆكوەزیران مەسرور بارزانی لەم دیدارەدا پێشنیازێکی بۆ سوود وەرگرتن لە ئەزموون و سیستمی خوێندن و پەروەردەی ژاپۆن لە هەرێمی کوردستان كرد، بە مەبەستی پێگەیاندنی نەوەیەکی پابەند و بەرپرسیار و بە دیسپلین و بەرهەمهێنەر و داهێنەر کە ڕێز لە کۆمەڵگە و دایک و باوک و مامۆستاکانی و بەرامبەرەکەی بگرێت و ژینگەپارێز بێت.

لەلایەكی دیكەوە: شاندی جایکای ژاپۆنی، خۆشحاڵی خۆیان بۆ پێشنیازی سەرۆكوەزیرانی هەرێمی كوردستان نیشاندا و ئامادەیی هەموو هاریکاری و پشتیوانییەکیان دەربڕی.

بۆچی گرنگە: دامەزراوەی جایكا ئاماژەیان بە نموونەیەكی سیستمی پەروەردەی ژاپۆن كرد كە ئێستا لە چەند قوتابخانەیەكی وڵاتی میسر جێبەجێ دەكرێت و لەم دیدارەدا پرۆفیسۆر سوگینا، سەرپەرشتیاری پڕۆژەکە لە میسر، کورتەیەکی دەربارەی ئەزموونی پەروەردەی ژاپۆنی لە وڵاتەکە خستەڕوو، كە دەكرێت بۆ هەرێمی كوردستانیش هەمان ئەزموون پەیڕەو بكرێت.