كات و شوێنی دابەشكردنی پارەی كارمەندانی کۆمیسیۆن لە دوو پارێزگا ڕاگەیێنرا

 

ئاڤا نیوز

سبەی دابەشكردنی پارەی كارمەندانی سەر سندووق لەسنووری پارێزگاكانی سلێمانی و هەڵەبجە و ئیدارەكانی گەرمیان و ڕاپەڕین دەستپێدەكات، كارمەندان دەتوانن لەڕێگەی ئەو بانكانەی دیاریكراون یاخود نزیكترین بنكەكانی دەنگدان، شایستەكانیان وەربگرن.

چیرۆكی سەرەكی: دوای چوار مانگ لە بەڕێوەچوونی هەڵبژاردنی پەرلەمانی كوردستان، پارەی 41 هەزار کارمەندی کۆمیسیۆن خرایە سەر هەژماری بانکی لقەکانی کۆمیسیۆن. لە پارێزگاكانی هەولێر و دهۆك و ئیدارە سەربەخۆكانی زاخۆ و سۆران، پارەكە بەسەر 26 هەزار كارمەندی كۆمیسیۆن دابەشكراوە، بەڵام تا ئێستا كارمەندانی سنووری پارێزگاكانی سلێمانی و هەڵەبجە و ئیدارەكانی گەرمیان و ڕاپەڕین بەهۆی چەند گرفتێكی تەكنیكییەوە دابەش نەكراوە.

ڕاگەیێنراوی فەرمی: ئەمڕۆ یەكشەممە 2025-02-23، نووسینگەی سلێمانیی كۆمیسیۆنی باڵای سەربەخۆی هەڵبژاردنەكانی عێراق ڕایگەیاند، كارمەندانی ڕۆژی هەڵبژاردن كە ژمارەیان سەرووی 15 هەزارە دەتوانن سەردانی لقی بانكەكان بۆ وەرگرتنی شایستە داراییەكانیان و ئەو شوێنانەشی كە بانكی لێ نییە، كارمەندان دەتوانن سەردانی بنكەكانی سەر بە كۆمیسیۆن بكەن بۆ وەرگرتنی پارەكە.

ئەوەی پێویستە بیزانیت:

یەكەم: له‌كاتی وه‌رگرتنی پاداشتەكە، پێویستە كارمەندان كارتی بایۆمه‌تری ده‌نگدان و كارتی نیشتمانی یاخود ناسنامەی باری شارستانی لەگەڵ خۆیان ببەن، ئەوانەشی كارتی دەنگدانیان لێ وەرگیراوەتەوە، دەبێت سەردانی ناوەندیی تۆماركردن بكەن بۆ وەرگرتنەوەی كارتەكانیان.

دووه‌م: له‌كاتی بوونی پشووی فه‌رمی، ڕۆژو به‌رواری دابه‌شكردنی پاداشته‌كه‌ گۆڕانكاریی به‌سه‌ردا دێت و ده‌كه‌وێته‌ ڕۆژانی دواتر.

سێیەم: جگه‌ له‌ خشته‌كان ده‌توانیت بۆ زانینی بڕی پاداشت و ناوی ئه‌و بانكه‌ی پاره‌كه‌ی لێوه‌رده‌گریت، كلیك له‌ یه‌كێك له‌م لینكانه‌ی خواره‌وه‌ بكه‌یت:

 یەکەم

 دووەم

زانیاریی زیاتر: پارەی کارمەندەکان بە پێی ئەرک و بەرپرسیارییەتیان لە رۆژی هەڵبژاردن دابەش دەکرێت بەم شێوەیە:

٠ ڕێكخەری بنکە 350 هەزار

٠ بەڕێوەبەری وێستگە ئەگەر فەرمانبەر بێت 150 هەزار و سوپاس و پێزانینێک کە پلە بەرزکردنەوەی دێنێتە پێش. ئەگەر فەرمانبەر نەبێت 250 هەزار وەردەگرێت.

٠ کارمەندانی یەدەگ 100 هەزار دیناریان بۆ خەرج دەکرێت.