پارتی: دادگەی فیدراڵی کار بۆ لاوازکردن و کەمکردنەوەی دەسەڵاتەکانی کوردستان دەکات

ئاڤا نیوز

مەکتەبی سیاسی پارتی ڕایدەگەیێنێت، دادگەی باڵای فیدراڵی کار بۆ لاوازکردنی هەرێمی کوردستان و کەمکردنەوەی دەسەڵاتەکانی دەکات. ئەمەش بووەتە هۆی ئاڵۆزیی پەیوەندییەکانی نێوان دەسەڵاتەكانی فیدراڵی و دەسەڵاتەكانی هەرێم و تێكدانیان.

ڕاگەیێنراوی فەرمی: مەكتەبی سیاسیی پارتی دیموكراتی كوردستان لە ڕاگەیێنراوێکدا بەفەرمی هەڵوێست و بۆچوونی لەبارەی بڕیارەکانی دادگەی باڵای فیدراڵی عێراق دژی هەرێمی کوردستان دەردەبڕێت.

پووختەی ڕاگەێنراوەکە:

- ماددە و بڕگەکانی دەستوور بەردەوام لەلایەن هەندێك لە دامودەزگا فیدراڵیەكانەوە پشتگوێ دەخرێن و پێشێل دەکرێن، لە هەمووشیان مەترسیدارتر ئەوەیە دادگای فیدراڵی دەيکات.

- دادگای فیدراڵی هەوڵی کەمکردنەوەی دەسەڵات و تایبەتمەندیەكانی هەرێم دەدات، كار دەکات بۆ لاوازکردنی دامەزراوەکانی و ڕێگە خۆش دەکات بۆ دەسەڵاتە فیدراڵییەکان تا زێدەڕۆیی بکەنە سەر دەسەڵاتە دەستوورییەكانی.

پەیوەست بە هەڵبژاردن:

- هەموارکردنەوەی یاسای هەڵبژاردنی پەلەمانی کوردستان کاری دادگای باڵای فیدراڵی نییە، كەمكردنەوەی ژمارەی کورسییەکانی پەرلەمان و نەهێشتنی کورسی پێکهاتەکان و دابەشكردنى هەرێم بۆ چەند بازنەیەک، پێشێلکردنی ئاشکرای دەستوورە.

- دادگا نەیتوانیوە بیسەلمێنێت سیستەمی یەك بازنەیی نادەستورییە. سیستەمی فرەبازنەییش خاڵی لاوازی هەیە، دەرفەت ناداتە حیزبە بچووك و مام ناوەندەكان نوێنەرایەتی دەنگەكانیان بەتەواوی بكەن، هەرچەندە لە بەرژەوەندیی حیزبە گەورەكانە.

- نەهێشتنی كورسی كۆتای پێكهاتەكان ناكۆكە لەگەڵ یاسای هەڵبژاردنی پەرلەمان و ئەنجومەنی پارێزگاکانی عێراق و دەستوور.

مەترسییە پێشبینیکراوەکان:

- بڕیارەکانی دادگای فیدراڵی بوونەتە هۆی ئاڵۆزیی پەیوەندییەکانی نێوان دەسەڵاتەكانی فیدراڵی و دەسەڵاتەكانی هەرێم و تێكدانیان، بە شێوەیەک هەڕەشە لەو بنەما دەستووریانە دەكات كە دەوڵەتی فیدراڵی و سیستەمی دیموكراسییان لەسەر بونیادنراوە.

- عێراق بە ئاراستەی سیستەمێكی مەركەزی هەنگاو دەنێت و لە سیستەمی دیموكراتی فیدراڵی دوور دەكەوێتەوە.

چارەسەرەکان:

- لەسەر هەموو هاوبەشەکانی حوکمڕانی بەگشتی و هاوپەیمانی ئیدارەی دەوڵەت بەتایبەتی پێویستە، بەجددی و بە پەرۆشەوە کاربکەن لەپێناو پابەندبوون بە دەستوور و بەندەكانی ڕێککەوتنی پێکهێنانى هاوپەیمانی ئیدارەی دەوڵەت.

- پێویستە پەلەبكرێت لە ئامادەكردن و دەرچوواندنی یاسای نەوت و گاز و یاسای دامەزراندنی ئەنجوومەنی فیدراڵی، بەتایبەتیش دەرچوواندنی یاسای دادگای باڵای فیدراڵی بۆ چارەسەرکردنی کێشەی شەرعیەتی دەستوریی ئەم دادگایە.

- پێویستە دەستوور ببێتە بنەما بۆ چارەسەركردنی كێشەكانی نێوان هەرێم و بەغدا و، لەمە زیاتر دادگای باڵای فیدراڵی بۆ مەرامی سیاسی بەكارنەهێنرێت.