دادگای کارگێڕی ڕەزامەندی لەسەر خانەنشینکردنی پارێزگاری بەغدا دەربڕی

 

ئاڤا نیوز

دادگای کارگێڕی ڕەزامەندی لەسەر ڕەوانەکردنی پارێزگاری بەغدا بۆ خانەنشینی پێشاندا و ئەو فەرمانە سالارییەشی هەڵوەشاندەوە کە بۆ ڕاگرتنی خانەنشینبوونەکەی دەریکردبوو تاوەکو یەکلاییبوونەوەی دۆسیەکە لە دادگا.

چیرۆکی سەرەکی: ڕۆژی 3ـی ئەم مانگە عەممار قەیسی، سەرۆکی ئەنجوومەنی پارێزگای بەغدا "لەسەر پشکی هاوپەیمانی عەزم"، بەپشتبەستن بە یاسای خانەنشینی یەکگرتوو، عەبدولموتەڵیب عەلی یوسف پارێزگاری بەغدای "لەسەر پشکی دەوڵەتی یاسا" ڕەوانەی خانەنشینی کرد و دواتر دادگای کارگێڕی عێراق فەرمانێکی سالاری بۆ ڕاگرتنی ڕێکارەکانی خانەنشینکردنەکە دەرکرد تاوەکو دۆسیەکە یەکلایی دەبێتەوە.

نووسراوی فەرمی: بەگوێرەی نووسراوێکی دادگای کارگێڕیی عێراق، بەهۆی ئامادەنەبوونی سکاڵاکار و بریکارەکەی تاوەکو کۆتایی دەوام، دادگا بڕیاریدا بە ڕەتکردنەوەی ئەو داوایەی لەلایەن پارێزگاری خانەنشینکراوی بەغدا دژی سەرۆکی ئەنجوومەنی پارێزگای بەغدا تۆمارکردبوو.

ئەوەی پێویستە بیزانیت: هاوپەیمانیی "قەرار و ئیعمار" کە لە فراکسیۆنەکانی "تەقەدوم، دەوڵەتی یاسا، ئەساس، بابیلۆن و ئبشیر یا عێراق" لە ئەنجوومەنی پارێزگای بەغدا پێکهێنراوە، بڕیارەکەی سەرۆکی ئەنجوومەنی پارێزگای بەغدایان ڕەتکردەوە و دواتریش لە لێدوانێکدا عەبدولموتەڵیب عەلی ڕایگەیاند؛ یاسای هەموارکراوی پارێزگاکان، تەمەنێکی دیاریکراوی بۆ خانەنشینکردنی پارێزگار دیاری نەکردووە و سکاڵای لە دادگا تۆمار کرد.