وەزارەتی وزەی تورکیا بۆ ئاڤا: کاتی هەناردەکردنەوەی نەوتی کوردستان دیارینەکراوە

 

ئاڤا نیوز

لەبارەی هەناردەکردنەوەی نەوتی کوردستان، وەزارەتی وزەی تورکیا لەڕێگەی ئاڤاوە وەڵامی حکومەتی عێراق دەداتەوە و ئاشکرای دەکات، هیچ بەرەوپێشچوونێک لەو بارەیەوە نییە و تاوەکو ئێستا هیچ وادەیەک بۆ دەستپێکردنەوەی دیارینەکراوە.

وێنە گەورەکە: هەردوو وەزارەتی نەوتی عێراق و سامە سرووشتییەکانی هەرێمی کوردستان لەسەر هەناردەکردنەوەی نەوت ڕێککەوتوون، تەنانەت ڕێککارە تەکنیکییەکان تەواوکراون و وەزیری نەوتی عێراق دەڵێت لە ماوەی هەفتەیەکدا دەستپێدەکاتەوە، کۆمپانیاکانی نەوتیش کارمەندەکانیان ئاگادار کردوونەتەوە هەفتەی داهاتوو دەست بە دەوام بکەنەوە.

لێدوانی تایبەت: وەزارەتی وزەی تورکیا لەڕێگەی ئیمەیڵەوە وەڵامی پرسیارێکی ئاڤا میدیای دایەوە و ڕاگەیاند: "تاوەکو ئێستا هیچ بەرەوپێشچوونێک لە بڕیاری دەستپێکردنەوەی هەناردەی نەوتی هەرێمی کوردستان لە بەندەری جەیهان - تورکیا لەلایەن وەزارەتەکەمانەوە نەبووە، بڕیاری نوێ دەرنەچووە و هیچ وادەیەک دیارینەکراوە، لە بوونی هەر بڕیارێکی نوێ ڕاگەیێنراوی فەرمیمان دەبێت".

باکگراوند: حەیان عەبدولغەنی، وەزیری نەوتی عێراق ئەمڕۆ لە لێدوانێکدا ڕایگەیاند، هەناردەکردنەوەی نەوت لە کێڵگە نەوتییەکانی هەرێمی کوردستان لە ماوەی هەفتەیەکدا دەستپێدەکاتەوە، بۆ ئەو مەبەستەش ئەوان چاوەڕێی ڕەزامەندی تورکیا دەکەن.