ڤایرۆسی 'شلکە و دەمکولی' لە هەرێمی کوردستان بڵاودەبێتەوە

ئاڤا نیوز

بڵاوبوونەوەی ڤایرۆسێک لەناو ئاژەڵاندا نیگەرانی ئاژەڵدارانی لێکەوتووەتەوە، بەڕێوەبەری ڤێتەرنەری هەولێریش دەڵێت 'ئەو ڤاکسینەی لە ئاژەڵەکان دراوە ڕەنگە کاریگەری نەبووبێت.

چیرۆکی سەرەکی: دوای بڵاوبوونەوەی تاعون لەنێو ئاژەڵان لە شارەکانی ناوەڕاست و خوارووی عێراق، لە هەرێمی کوردستانیش ڤایرۆسێک بڵاوبووەتەوە کە تووشی ئاژەڵی گەورە و بچووک دەبێت، بەو هۆیەوە دەیان ئاژەڵ مرداربوونەتەوە.

لێدوانی فەرمی: د. مامەند محەممەد، بەڕێوەبەری ڤێتەرنەری هەولێر، بە ئاڤا میدیای ڕاگەیاند: ئەو ڤایرۆسەی بڵاوبووەتەوە 'شلکە و دەمکولی'ە، هەندێک ئاژەڵدار ڤاکسینەکەی حکومەتیان ڕەتکردەوە و لە شوێنی دیکە ڤاکسینیان بۆ ئاژەڵەکانیان کردوون، دوورنییە ئەو ڤاکسینەی بەکاریانهێناوە کاریگەری نەمابێت، بۆیە ئاژەڵەکان تووشی ئەم ڤایرۆسە بوون.

زانیاریی تایبەت: ساڵانە لە وەرزی بەهار و پایزدا دەبێت ئاژەڵان بکوترێت، بۆ ئەوەی بەرگری بەهێزبێت.

زانیاریی زیاتر: ئەو ڤاکسینەی وەزارەتی کشتووکاڵ بەکاریدەهێنێت "تورکی، ئەورووپی و ئەمریکی"ـن، بە مەرجیش ڕێگە بە کەرتی تایبەت دەدرێت بۆ هاوردەکردنی  ئەو جۆری ڤاکسینانە.

ئەوەی پێویستە بیزانیت: ئەو ئاژەڵانەی بە نایاسایی هاوردەی هەرێمی کوردستان دەکرێن و نەکوتراون، ئەگەری توشبوونیان بەو نەخۆشییە زیاتر  هەیە.

ئەمەش بزانە: لە هەرێمی کوردستان 750 هەزار ئاژەڵی بچووک و 80 هەزار ئاژەڵی گەورە هەیە، ئەمە جگە لە هاوردەکردنی ئاژەڵ لە دەرەوە.