لە کوردستان ئەمشەو ساردترین شەوی ساڵ دەبێت

ئاڤا نیوز

بەگوێرەی پێشبینی کەشناسی بێت، ئەمشەو لە ناوچە چیاییەکانی هەرێمی کوردستان و باکووری کوردستان نزمترین پلەی گەرمی تۆمار دەکرێت و لە هەندێ ناوچە تا 40 پلە ژێر سفری سیلیزی تۆمار دەکرێت.

لێدوانی فەرمی: شێخ دارا، شارەزای کەشناسی و پێشکەشکاری ئاڤا میدیا دەڵێت: ناوچەکانی کوردستان ژمارەیەکی پێوانەیی مێژووییان لە ساردی تۆمارکردووە، نزمترین پلەی گەرمی لەسەر ئاستی جیهان لە چیای ئاراراتی باکووری کوردستان تۆمارکراوە کە 40 پلە لە ژێر سفر بووە. تەنیا شارێکی ڕووسیا و ناوچەیەکی سیبریا ئەو پلەیان تۆمار کردووە.

شێخ دارا زانیاری دیکە لەبارەی کەشوهەوای ناوچە جیاوازەکان بەمجۆرە دەخاتەڕوو:

لە چیای حەسارۆست 34 پلە ژێر سفری سیلیزی تۆمار کراوە، لە مێژووی ئەم ناوچەیە پلەی نزمی ئاوا تۆمار نەکراوە، ئەمەش بەهۆی ئەو شەپۆلە سیبریەی ڕووی کردوەتەوە ناوچەکە و تا کۆتایی هەفتە بەردەوام دەبێت.

ئەمشەو چیای ئارارات ساردترین دەبێت و هەموو شارەکانی هەر چوار پارچەی کوردستان پلەکانی گەرمایان لە ژێر سفری پلەی سیلیزی دەبن.

لە سەرەتای هەفتەی داهاتوو شەپۆلێکی دیکە باران بارین ڕوو لە ناوچەکە دەکات و ماوەی پێنج ڕۆژ بەردەوام دەبێت.