لە عێراق گەندەڵی هەڕەشە لە پڕۆژەکانی وەبەرهێنان دەکات

ئاڤا نیوز

لیژنەی دەستپاکی پەرلەمانی عێراق، سەرۆکی دەستەی وەبەرهێنان بە ئەنجامدانی سەرپێچی کارگێڕی و یاسایی لە کارەکانی تۆمەتبار دەکات و دەڵێت، "گەندەڵی هەڕەشە لە پڕۆژەکانی وەبەرهێنان دەکات"

چیرۆکی سەرەکی: لە ساڵی 2006 حکومەتی عێراق یاسای ژمارە 13ـەی وەبەرهێنانی دەرکرد، بەپێی یاساکە دەستەی وەبەرهێنانی نیشتمانی (NIC)ـی لە ساڵی 2007 دامەزرا  و له ساڵی 2008 دەستی به کاره کانی کردووه.

لێدوانی فەرمی: حەمید شیبلاوی، ئەندامی لیژنەی دەستپاکی پەرلەمانی عێراق ڕایگەیاند:

- سەرەڕای کۆکردنەوەی واژۆی زیاتر لە 110 پەرلەمانتار بۆ لێپرسینەوە لەگەڵ حەیدەر محەممەد مەکییە، سەرۆکی دەستەی وەبەرهێنان، بەڵام تاوەکو ئێستا سەرۆکایەتی ئەنجوومەنی نوێنەرانی عێراق ئامادە نییە ڕێکارەکانی پەیوەست بەو بابەتە بگرێتە بەر.

- سەرۆکی دەستەی وەبەرهێنانی عێراق چەندین پێشێلکاری یاسایی و کارگێڕی کردووە و زۆربەی ئەندامانی خێزانەکەی لەدەستەکە دامەزراندووە.

- بەشێک لەو زەوییانەی بەنرخێکی کەم دراوەتە وەبەرهێنەر، بە ملیارەها دینار فرۆشراوە و بۆ پڕۆژەی دیکە بەکارهاتووە.

ئەوەی پێویستە بیزانیت: بەهۆی پابەندنەبوونی وەبەرهێنەران بەمەرجەکانی دەستەی وەبەرهێنان زیانی گەورە بەر توانای ئابووری پرۆژەکان کەوتووە، هاوکات چەندین بەڵگە بەردەستە کە هەدەردانی نزیکەی 300 ملیار دینار دەسەلمێنێت.