ڕاوێژکاری نوێی ئەڵمانیا ڕەخنەگرێکی سەرسەختی ترەمپ و ئەمریکایە

 

ئاڤا نیوز

دوای ڕاگەیاندنی ئەنجامە بەراییەکانی هەڵبژاردنەکانی ئەڵمانیا، پارتەکەی فریدریش مێرتز پلەی یەکەمی بەدەستهێناوە و دەبێتە ڕاوێژکاری نوێی ئەڵمانیا. لە ئێستاوە دژایەتی ئەمریکا و دۆناڵد ترەمپ دەکات

چیرۆکی سەرەکی: لە ئەنجامی هەڵبژاردنە پەرلەمانییەکەی ئەڵمانیا، کە 59 ملیۆن ئەڵمانی مافی دەنگدانیان هەبوو و زیاتر لە 80% بەشدارییان تێدا کرد، هاوپەیمانیی ڕاستڕەوەکان کە لە کریستیان دیموکراتەکان و کریستیان سۆسیالەکان پێکدێت، توانی سەرکەوتن بە دەست بهێنێت و بەم پێیە 'فریدریش مێرتز' لە پارتی 'کریستیان دیموکرات' دەبێتە ڕاوێژکاری ئەو وڵاتە.

ژمارەکان وا دەڵێن: بە گوێرەی ئەنجامەکان، ئەم هاوپەیمانییە توانیویەتی بە بەدەستهێنانی 28%ـی دەنگەکان کە دەکاتە 208 کورسی لە کۆی 603 کورسی پەرلەمان، پلەی یەکەم بەدەست بهێنێت.

بە دوای ئەویشدا پارتی ڕاستڕەوی 'ئەڵتەرناتیڤ بۆ ئەڵمانیا' دێت کە نزیکەی 21%ـی دەنگەکان و 151 کورسی بەدەستهێناوە، کە دەکاتە دوو هێندەی دەنگەکانی لە هەڵبژاردنی 2021 و هاوکات لە دوای جەنگی یەکەمی جیهانەوە، ئەمە یەکەمجارە پارتێکی ڕاستڕەو بتوانێت ئەو ڕێژە زۆرە لە دەنگ بەدەست بهێنن.

زانیاریی زیاتر: ڕاستڕەوەکان بە سیاسەتەکانیان لە دژی کۆچبەران و نەتەوەپەرەستی بەناوبانگن. قەیرانی ئابووری، پرسی کۆچبەران و هێرشەکانی چەند هەفتەی ڕابردوو بوونە هۆی گەشەی زیاتری ڕاستڕەوەکان.

ئەوەی پێویستە بیزانیت: حکومەتی داهاتووی ئەڵمانیا حکومەتێکی هاوپەیمانی دەبێت کە پێکهێنانی حکومەت و داڕشتن و تێپەڕاندنی یاساکان پێویستییان بە پشتیوانیی ڕاستڕەوەکان 'پارتی ئەڵتەرناتیڤ' هەیە.

ئەوەی لەبارەیەوە دەگوترێت: مێرتز بەڵێنی داوە کار بکات بۆ چارسەرکردنی کێشەکانی ئەڵمانیا و هەروەها بەهێزکردنی ئەوروپا بە جۆرێک کە بتوانێت لە ڕووی ئەمنییەوە لە ئەمریکا سەربەخۆ بێت و بۆ دابینکردنی ئاسایشی خۆی پێویستیی بە ئەمریکا نەبێت و ئەمەش لە چوارچێوەی گۆڕانکاری لە هاوپەیمانی ناتۆدا دێتە ئاراوە.  ئەو ڕەخنە لەوە دەگرێت کە ئەمریکا وازی لە پشتیوانیی ئۆکراینا هێناوە و پێی وایە ئەوروپا دەبێت ئەوەندە خۆی بەهێز بکات کە پێویستیی بە ئەمریکا نەمێنێت.