سەرۆکوەزیرانی عێراق: دەبێت هۆکاری پێویست هەبێت بۆ ڕاگرتنی دەوام

ئاڤا نیوز

 

محەممەد شیاع سوودانی، سەرۆکوەزیرانی عێراق، بەهۆی ڕاگرتنی دەوام لە ناوەندەکانی خوێندن لە بەشێک لە پارێزگاکانی عێراق، فەرمانێکی ئاڕاستەی پارێزگاکان کرد کە دەبێت "هۆکاری پێویست و ڕاستەقینە" هەبێت بۆ ڕاگرتنی دەوام.

 

ڕاگەیێنراوی فەرمی: باسم عەوادی، وتەبێژی حکومەتی عێراق لە بەیاننامەیەکدا ڕایگەیاند: محەمەد شیاع سوودانی، سەرۆکوەزیرانی عێراق ئەمڕۆ سێشەممە، فەرمانی بە پارێزگارەکان کرد، کە هۆکاری ڕاستەقینە و پێویست بۆ ڕاگرتنی دەوامی فەرمی هەبێت، پێویستە ڕاپۆرتی بارودۆخی کەشوهەوا بخەنەڕوو لەکاتی ڕاگرتنی دەوامی قوتابخانەکان. 

 

-    پێویستە کاتی پێویست بۆ تەواوکردنی مەنهەجی خوێندن لە بەرچاو بگیرێت و پابەندبن بە کاتی دیاریکراوی ساڵی خوێندن.

 

زانیاریی زیاتر: لەگەڵ هاتنی شەپۆلێکی سارد و سەرما لە عێراق، پارێزگاکانی نەینەوا، دیالە، موسەنا، نەجەف، سەڵاحەددین و بابل دەوامی قوتابخانەکانیان ڕاگرت.

 

ئەمەش بزانە: یەکشەممەی ڕابردووش، هەشت پارێزگا دەوامی فەرمییان ڕاگرت، بەبۆنەی بەخاکسپاردن و پرسەی حەسەن نەسروڵڵا و هیشام سەفیەددین، هەردوو ئەمینداری گشتی حیزبوڵڵای لوبنانی، کە لە ساڵی ڕابردوو  لەلایەن ئیسرائیلەوە کوژران.