عێراق بۆ بەکارهێنانی وزەی ئەتۆم و واژۆکردنی ڕێککەوتنێک دەچێتە چین

ئاڤا نیوز

ئەنجوومەنی وەزیران دەسەڵات دەداتە سەرۆکی دەستەی وزەی ئەتۆمی عێراق بە مەبەستی واژۆکردنی ڕێککەوتنێک لەگەڵ چین بە مەبەستی بەکارهێنانی وزەی ئەتۆمی ئاشتییانە.

بۆچی گرنگە: خواست لەسەر بەرهەمهێنانی کارەبا بەوزەی ئەتۆم کە 10%ی کارەبای جیهان پێکدەهێنێت، لە زیادبووندایە و عێراقیش لەو ڕێگەیەوە دەیەوێت سوود لە بەکارهێنانی ئاشتییانەی وزەی ئەتۆم ببینێت بە گرێبەستکردن لەگەڵ ئەو وڵاتانەی خاوەن وەزەی ئەتۆمن.

ڕاگەیێنراوی فەرمی: بەگوێرەی ڕاگەیێنراوێکی نووسینگەی سەرۆکوەزیرانی عێراق لە کۆبوونەوەی ئەمڕۆی ئەنجوومەنی وەزیراندا لە چوارچێوەی بەرزکردنەوەی هاوکاری نێودەوڵەتی لە بواری وزەی ئەتۆمی ئاشتییانە،

- دەسەڵات درایە  نەعیم عەبودی، وەزیری خوێندنی باڵاو توێژینەوەی زانستی و سەرۆکی دەستەی وزەی ئەتۆمی بۆ دانوستان و واژۆکردنی ڕەشنووسی ڕێککەوتنی هاوکاری لەنێوان حکومەتی عێراق و حکومەتی کۆماری میللی چین لە بواری بەکارهێنانی ئاشتیانەی وزە.

- ئەنجوومەنی وەزیران وەزارەتی دەرەوەش ڕادەسپێرێت بۆ ئامادەکردنی بەڵگەیەک بۆ ئەو دەسەڵاتپێدانە و بەرزکردنەوەی بۆ ئەمیندارێتی گشتی ئەنجوومەنی وەزیران بەمەبەستی بەدەستهێنانی واژۆی سەرۆکی حکومەت.

ئەوەی پێویستە بیزانیت: لە پەراوێزی چالاکییەکانی شەست و هەشتەمین کۆنفرانسی گشتیی ئاژانسی نێودەوڵەتی وزەی ئەتۆم لە ڤییەنا لە 17ی ئەیلوولی 2024، دەستەی وزەی ئەتۆمی عێراق و دامەزراوەی وزەی ئەتۆمی ڕووسیا "ROSATOM" یاداشتێکی لێکتێگەیشتنیان لەبواری بەکارهێنانی ئاشتیانەی وەزەی ئەتۆم واژۆ کرد.