دڵنیایی بە کەسوکاری پلە یەک و دووی شەهیدان و خانەنشینکراون دەدرێت

ئاڤا نیوز

بەرپرسی فەرمانگەی تەکنەلۆژیای زانیاری، دڵنیایی لە چارەسەرکردنی کێشەی ئەو فەرمانبەرانە دەدات کە کەسوکاری پلە یەک و پلە دووی شەهیدان و خانەنشینکراون. دەڵێت، بۆ مانگی دوو ناویان خراوەتەوە نێو لیستی مووچە.

وێنە گەورەکە: لە هەرێمی کوردستان بە پێی نووسراوی ئەنجوومەنی وەزیران، ئەو فەرمانبەرانەی کە کەسوکاری پلە یەک و پلە دووی شەهیدن، پێنج ساڵ ماوەی خانەنشینییان درێژ دەکرێتەوە، بەمەش خانەنشینییان دەبێتە 65 ساڵ.

لێدوانی فەرمی: هیوا ئەفەندی، بەرپرسی فەرمانگەی تەکنەلۆژیای زانیاری بە ئاڤا میدیای ڕاگەیاند:

- وەزارەتی دارایی عێراق لە ناوەڕاستی مانگی یەک داوای خانەنشینبوونی فەرمانبەرانیان کرد، بەپێی یاسا هەندێک لە خانەنشینان تەمەنی خانەنشینییان 65 ساڵە، بۆیە دەبێت هەندێک بەڵگەنامە هاوپێچ بکرێت لەگەڵی بۆ ئەوەی دیاربێت کە شمولی 65 ساڵی دەکات یان 60 ساڵی.

- هەندێک لەوانەی کە نەدەبوو خانەنشین بکرێن ناویان لە لیستەکەدا هەبوو. بەڵام ئەم مانگە کاتی زیاترمان تەرخانکرد بۆ ئەوەی هەموو ئەو خەڵکەی بە نایاسایی خانەنشین کراون لەوانە کەسوکاری پلە یەک و دووی شەهیدن، هەموومان جیاکردوونەتەوە و بۆ بەغدامان ناردووەتەوە لەگەڵ ڕوونکردنەوەی پێویست. ئەوانە جارێکی ناویان خراوەتەوە نێو لیستی فەرمانبەران.

ئەوەی پێویستە بیزانیت: پاڵپشت بە حوکمەکانی ماددەی دوو لە یاسای ژمارە 26ـی ساڵی 2019ـی یاسای هەمواری یەکەمی یاسای خانەنشینی یەکگرتوو ژمارە 9ـی ساڵی 2014 بەدەر لە تەمەنی یاسایی خانەشینی، ئەو فەرمانبەرانەی کە کەسوکاری پلە یەک و پلە دووی شەهیدن، پێنج ساڵ ماوەی خانەنشینییان درێژ دەکرێتەوە، بەمەش خانەنشینییان دەبێتە 65 ساڵ.