وردەکاری ئامادەکردنی لیستی مووچەی مانگی دوو و سێ ئاشکرا دەکرێت

ئاڤا نیوز

بەرپرسی فەرمانگەی تەکنەلۆژیای زانیاری، زانیاریی ورد لەسەر ئامادەکردنی لیستی مووچەی دوو و سێ ئاشکرا دەکات و ئاماژە بۆ ئەوە دەکات کە شەش هەزار كەس لەسەر سیستمی پەیڕۆڵ كار دەكەن و دەشڵێ هیچ بیانووێکمان بۆ بەغدا نەهێشتووەوە.

چیرۆکی سەرەکی: پرسی مووچە لەنێوان هەولێر و بەغدا بڕاوەتەوە و ڕێککەوتن کراوە، ڕێککەوتنەکە بۆ کۆی ئەمساڵە، بەڵام بەهۆی خانەنشینبوونی دەیان هەزار فەرمانبەر و چەند داواکارییەکی نوێی وەزارەتی دارایی عێراق ناردنی لیستی مووچەی مانگی شوبات دواکەوت.

لێدوانی فەرمی: هیوا ئەفەندی، بەرپرسی فەرمانگەی تەکنەلۆژیای زانیاری بە ئاڤا میدیای ڕاگەیاند:

- بۆ یەکەمجارە لەمێژووی حکومڕانی کورد لە هەرێمی کوردستان لیستی سەرجەم مووچەخۆران بە یەک سیستمی دیجیتاڵی ناوەندی ئامادەکراوە. لیستی مووچەی مانگی دوو بەیانی ڕۆژی چوارشەممە دەنێرینە بەغدا.

- دواکەوتنی ناردنی لیستی مووچەی مانگی شوباتی بۆ ئەو مەرجانە گەڕاندەوە کە وەزیری دارایی حکومەتی فیدراڵ لەسەر ئەوانی سەپاندووە و دەڵێت: یەکێک لە مەرجەکانی ئەوەبووە، دەبێت داتاکان بۆ ژمارەی وەزیفیش ڕەوانە بکرێت بۆ وەزارەتی پلاندانانی فیدراڵ، مەرجەکەش قورسە بۆ هەموو مووچەخۆرێک داوای ناوی چواری دایکییان کردووە، زۆربەی یەکە ژمێریارییەکانیش ئەو داتایانەیان لەلا نەبووە کە سەدان هەزار کەسە. بەڵام ئێمە هەردوو داواکارییەکەمان جێبەجێکردووە.

- نزیکەی هەزار و 155 یەکەی ژمێریاریمان هەیە، هەر یەکەیەک سێ بۆ چوار کەس کاری تێدەکات، بە گشی زیاتر لە شەش هەزار کەس لەسەر سیستمی پەیڕۆڵ کار دەکات، هەموو ئەو کارانەی کە دەکرێت بە شێوەی دیجیتاڵی دەکرێت، تەنانەت کاتێک دەگاتە خەزێنەی حکومەت ئەوانیش بەشێوەی دیجیتاڵی پەسندی دەکەن. بەڵام کاتێک دەمانەوێت بۆ بەغدای بنێرین دەگەڕێینەوە ساڵی نەوەدەکان و دەبێت بیکەنەوە کاغەز و سی دی و فایلی ئێکسڵ.

- ئەوەی ئەمجارە کردوومانە، لەو ڕێگەیەوە ویستوومانە هیچ بیانووێک بۆ بەغدا نەهێڵینەوە کە کێشەمان بۆ دروست بکەن، تەنانەت ئەگەر بیانەوێت خۆیان پێداچوونەوە بە زانیارییەکان بکەن لە ڕێگەی ئەو سیستمەوە دەتوانن وردبینی بکەن و بیانوومان پێ نەگرن. هەموو ئەو بیانوویانەی لەو چەند ساڵە هەیانبووە هەمووی چارەسەر کراوە.

- بۆ مووچەی مانگی سێ، ڕێوشوێنەکانی ناردنی لیست و ئامادەکردنی ئاسانتر دەبێت و لە ماوەی کەمتر لە دوو هەفتە ئامادە دەبێت، واتە دەتوانین لە 15ی 3 تەنانەت لە ماوەی 10 ڕۆژ لیستی مووچەی مانگی سێ ئامادە بکەین. چونکە هیچ گۆڕانکارییەکی ئەوتۆ ناکرێت و لیستەکان قوفل کراون، نە سەرمووچە بەرزکردنەوە هەیە نە پلە بەرزکردنەوە هەیە، نە زیادبوونی کەس لەسەر لیستەکە و نە گواستنەوە، بەگوێری بڕیاری سەرۆکایەتی ئەنجوومەنی وەزیران.