فوئاد حوسێن: کۆمپانیاکانی ڕووسیا بە بەهای 19 ملیار دۆلار وەبەرهێنانیان لە عێراق کردووە

ئاڤا نیوز

وەزیری دەرەوەی عێراق ڕایگەیاند، لەگەڵ وەزیری وزەی ڕووسیا باسیان لە هەناردەکردنەوەی نەوتی هەرێمی کوردستان لە ڕێگەی هێڵی بۆری عێراق و تورکیا کردووە، جەختیشی کردەوە کە پێشوازی لە وەبەرهێنانی کۆمپانیاکانی ڕووسیا دەکەن کە تائێستا بە بەهای 19 ملیار دۆلار وەبەرهێنانیان لە عێراق کردووە.

ئەوەی پێویستە بیزانیت: عێراق و ڕووسیا لە دوای ساڵی 2003ەوە 16 ڕێککەوتن و یاداشتی لێکتێگەیشتنیان لەبوارە جیاوازەکان واژۆکردووە، بەغدا و مۆسکۆش خواستی خۆیان بۆ زیاتر پەرەپێدانی پەیوەندییەکان دووپات دەکەنەوە.

لێدوانی فەرمی: فوئاد حوسێن، وەزیری دەرەوەی عێراق لە میانی پێشوازیکردنی لە سێرگی تسیڤیلێڤ، وەزیری وزەی ڕووسیا ڕایگەیاند:

- ئەمڕۆ بە ئامادەبوونی لایەنە پەیوەندیدارەکان لەبوارەکانی هەماهەنگی دەریایی، تەندروستی، بازرگانیی و وزە ژمارەیەک یاداشتی لێکتێگەیشتنمان واژۆکرد.

- پێشوازی لە وەبەرهێنانی کۆمپانیاکانی ڕووسیا دەکەین کە لە ماوەی ڕابردوودا بە بەهای 19 ملیار دۆلار وەبەرهێنانیان لە کەرتەکانی نەوت و غازدا کردووە و کۆمپانیاکانی ئەو وڵاتە لە ناوچە جیاوازەکانی عێراق و هەرێمی کوردستان چالاکن.

- بەشێک لە گفتوگۆکان تایبەت بوون بە بابەتی هەناردەکردنەوەی نەوتی هەرێمی کوردستان لە ڕێگەی هێڵی بۆڕی عێراق و تورکیا.

- هەڵسەنگاندن بۆ ڕێککەوتن و یاداشتەکان کرا و هەردوولا بەدواداچوون بۆ ئەو کەمووکوڕی و سستییانە دەکەین کە لە جێبەجێکردنیاندا دروستبوون، کاریش بۆ لابردنی ئاستەنگییەکانی بەردەمیان دەکەین.