کار لەسەر ناردنی بودجەی پەرەپێدانی پارێزگاکانی هەرێمی کوردستان دەکرێت

ئاڤا نیوز

داواکارییەکانی پارێزگاکانی هەرێمی کوردستان لە ڕاپۆرتێکدا کۆدەکرێنەوە و لەگەڵ وەزارەتەکانی پلاندانان و دارایی عێراق تاوتوێ دەکرێن.

چیرۆکی سەرەکی: ئەندامانی کورد لە لیژنەى پەرەپێدانى هەرێم و پارێزگاکانى ئەنجوومەنی نوێنەرانی عێراق ڕۆژی سێشەممە لەگەڵ پارێزگاری هەولێر کۆبوونەوە و دواتر کۆنگرەیەکی ڕۆژنامەوانییان ساز کرد، بڕیارە سەردانی پارێزگاکانی دیکەش بکەن.

بابەتی ستراتیژی: بودجەی پەرەپێدانی پارێزگاکان لە عێراق لەسەر بنەمای ژمارەی دانیشتووان دیاری دەکرێت. لە بودجەی ساڵی 2023 پشکی پارێزگاکانی هەرێمی کوردستان بە 267 ملیار دینار دیاریکراوە، بەڵام تاوەکو ئێستا نەنێردراوە.

لێدوانە فەرمییەکان:

ئومێد خۆشناو، پارێزگاری هەولێر: لە ساڵی 2012ەوە هەرێمی کوردستان لەو بودجەیە بێبەش کراوە، لەمبارەیەوە داواکارییەکانمان ئاراستەی لیژنەى میوان کرد.

کوردۆ عومەر، ئەندامی لیژنەکە: داواکارییەکانی سەرجەم پارێزگاکانی هەرێم لە ڕاپۆرتێک کۆدەکەینەوە، دواتر وەزیری دارایی بۆ گفتوگۆکردن لەبارەی داواکارییەکان بانگهێشت دەکەین.

شێروان دووبەردانی، ئەندامی لیژنەکە: بودجەی پەرەپێدانی پارێزگاکان و بودجەی تەشغیلی و بودجەی باری لەناکاو جیاوازن و پێویستە مانگانە بۆ هەرێمی کوردستان بنێردرێن.

زانیاریی زیاتر: لە کۆنگرە ڕۆژنامەوانییەکەدا جەخت کرایەوە لەسەر حکومەتی عێراق پێویستە لە بودجەی باری لەناکاو یارمەتی زیانلێکەوتووانی بازاڕی لەنگە و هەر بارێکی لەناکاوی هەولێر و شارەکانی دیکەی هەرێمی کوردستان بدات.