وەزیری نەوتی عێراق گەیشتن بە ڕێککەوتنی لەگەڵ هەرێمی کوردستان ڕاگەیاند

ئاڤا نیوز

وەزیری نەوتی عێراق گەیشتن بە ڕێککەوتنی لەگەڵ هەرێمی کوردستان لەبارەی بەگەڕخستنەوەی بۆڕیی نەوتی بەندەری جەیهان ڕاگەیاند.

لێدوانی فەرمی: حەییان عەبدولغەنی، وەزیری نەوتی عێراق ڕایگەیاند:

- لەگەڵ هەرێمی كوردستان بۆ بەگەڕخستنەوەی بۆریی نەوتی بەندەری جەیهان، ڕێككەوتووین.

- زنجیرەیەک كۆبوونەوەمان لەگەڵ وەزارەتی سامانە سروشتییەكانی حكومەتی هەرێمی كوردستان كردووە و لێكگەیشتنی بەرهەمدار و گرنگییان هەبووە.

- گەیشتووینەتە ڕێککەوتنێک کە گەرەنتی کاری هاوبەش دەکات بۆ کارپێکردنی هێڵی بۆڕی بەندەری جەیهانی تورکیا.

ئەوەی پێویستە بیزانیت: پێشتر حەیان عەبدولغەنی، وەزیری نەوتی عێراق ڕایگەیاندبوو، هەناردەکردنەوەی نەوت لە کێڵگە نەوتییەکانی هەرێمی کوردستان لە ماوەی هەفتەیەکدا دەستپێدەکاتەوە، بۆ ئەو مەبەستەش ئەوان چاوەڕێی ڕەزامەندی تورکیا دەکەن.

لێدوانی تایبەت: وەزارەتی وزەی تورکیا لەڕێگەی ئیمەیڵەوە وەڵامی پرسیارێکی ئاڤا میدیای دایەوە و ڕاگەیاند: تاوەکو ئێستا هیچ بەرەوپێشچوونێک لە بڕیاری دەستپێکردنەوەی هەناردەی نەوتی هەرێمی کوردستان لە بەندەری جەیهان - تورکیا لەلایەن وەزارەتەکەمانەوە نەبووە، بڕیاری نوێ دەرنەچووە و هیچ وادەیەک دیارینەکراوە، لە بوونی هەر بڕیارێکی نوێ ڕاگەیێنراوی فەرمیمان دەبێت.