ئاڤا هۆکاری دواکەوتنی مامەڵەی خانەنشینان ئاشکرا دەکات

ئاڤا نیوز

 تیمێکی ئاڤا سەردانی بەڕێوەبەرایەتی گشتیی خانەنشینیان کرد، وەڵامی 100 پرسیاری پەیوەست بە خانەنشینانی مەدەنی و سەربازی لە بەڕێوەبەری گشتیی خانەنشینی وەرگرتووەتەوە و هۆکاری دواکەوتنی مامەڵەی خانەنشین بوونی فەرمانبەران دەخاتەڕوو.

وێنە گەورەکە: ساڵانە سەدان فەرمانبەر لە هەرسێ سلکی مەدەنی، سەربازی و پێشمەرگە خانەشین دەبن و دەبێت ڕاژەکانیان بگوازرێتەوە سەر بەڕێوەبەرایەتی گشتیی خانەنشینی هەرێمی کوردستان، جا هەیە شەش ساڵ زیاتر خانەنشین بووە تاوەکو ئێستا مووچەی خانەنشینیان وەرنەگرتووە، لەم ڕۆژانە سەدان تەلەفۆن بۆ تیمی ئاڤا هاتووە ئەوانەی کە لەسەر مەلەفی خانەنشینان قسەیان کردووە و دەڵێن، ئەوەندە ساڵەیە خانەنشین بووین تا ئێستا چارەنووسی مووچەکانمان نادیارە.

لێدوانی فەرمی: مریەم عوسمان، بەڕێوەبەری گشتیی خانەنشینی هەرێمی کوردستان لەوەڵامی تیمی ئاڤا گوتی، "هۆکاری دواکەوتنی مامەڵەی خانەنشین بوون خودی ئەو وەزارەتانەن کە لێی خانەنشین دەبن، چونکە فایلەکان بە کەم و کوڕی دەنێرن بەمەش دەبێ بۆیان بنێرینەوە و تەواوکردنی مامەڵەکە دوا دەکەوێت."

زانیاریی زیاتر: سەرجەم بەڕێوەبەرایەتییەکان، ئەوانەی کێشەی کارکردنیان لەسەر ئەو سیستەمە هەیە کە مامەڵەی خانەنشینانی تێدا تۆماردەکەن، 13 کارمەندی بەڕێوەبەرایەتی گشتیی دانراون بۆ ئەوەی لە کاتی پێویستدا هاوکاریان بکەن بۆ پرۆسەی تۆمارکردنەکە.