لەبارەی ئەو ئێزدییانەی کەوتنە دەستی داعش وتە لە هاوسەری ئەبوبەکر بەغدادی وەردەگیرێت

 

ئاڤا نیوز

ناوەندی نیشتیمانی بۆ هەماهەنگی نێودەوڵەتی دادوەری سەر بە ئەنجوومەنی باڵای دادوەری عێراق ڕایگەیاند، لەبارەی ئەو ئێزدییانەی کەوتنە دەستی داعش وتەیان لە هاوسەری ئەبوبەکر بەغدادی، خەلیفەی پێشووتری داعش وەرگرتووە و وتەکانی بە دۆکیومێنت کراون.

وێنە گەورەکە: مانگی شوباتی ساڵی ڕابردوو ئەنجوومەنی باڵای دادوەری عێراق گێڕانەوەی ئەسما محەممەد، هاوسەری یەکەمی ئەبوبەکر بەغدادی لە تورکیاوە بۆ وڵات ڕاگەیاند بەمەبەستی دادگاییکردنی، مانگی تەمموزیش لەسەر دۆسیەی دەستبەرکردنی کچ و ژنانی ئێزدیی و بێسەروشوێنکردنیان و هاوکاری داعش، بڕیاری لەسێدارەدانی بەسەردا سەپاند.

ڕاگەیێنراوی فەرمی: ناوەندی نیشتیمانی بۆ هەماهەنگی نێودەوڵەتی دادوەری سەر بە ئەنجوومەنی باڵای دادوەری عێراق لە ڕاگەیێنراوێکدا دەڵێت، وتە لەو هاوسەرەی ئەبوبەکر بەغدادی وەرگیراوە، لەبارەی ئەو تاوانانەی لە بێسەروشوێنکردنی کچ و ژنانی ئێزدیی و پێکهاتەکانی دیکە ڕێکخراوی داعش ئەنجامیداون.

ئەوەشی خستووەتەڕوو، لێکۆڵینەوەکە بەهاوکاری دادگای یەکی لێکۆڵینەوەی کەرخ بووە و ژمارەیەک زانیاری گرنگ تۆمارکراون کە هاوکاردەبن بۆ بەسزاگەیاندنی بکەرانی ئەو تاوانانە، هاوکات وتەی هاوسەری بەغدادی لەبارەی ڕفاندن و کوژرانی کایلا مۆلەر کچە ڕۆژنامەنووسی ئەمریکی وەرگیران.