هەرێمی كوردستان بانگهێشتی لووتكەی توركیا بۆ وەبەرهێنان و بازرگانی دەكرێت

ئاڤا نیوز

حكومەتی هەرێمی كوردستان بۆ بەشداریكردن لە لووتكەی وەبەرهێنان و بازرگانی كە بڕیارە لە مانگی ئایاری ئەمساڵ لە توركیا بکرێت، بەفەرمی بانگهێشت دەكرێت.

وێنە گەورەكە: شاندێكی بازرگانان و خاوەنكارانی توركیا كە ئەندامی كۆمەڵەی پیشەسازان و خاوەنكارانی نێودەوڵەتیی توركیا 'یوسیاد'ـن، سەردانی هەرێمی كوردستانیان كردووە و لەگەڵ بەشێك لە وەزارەتە پەیوەندیدارەكانی حكومەتی هەرێمی كوردستان بۆ پرسی ئاڵوگۆڕی بازرگانی و پیشەسازی و برەودان بە وەبەرهێنان كۆبوونەوە.

ڕاگەیێنراوی فەرمی: سەروەر كەمال هاواری، بریكاری وەزارەتی بازرگانی و پیشەسازیی هەرێمی كوردستان بۆ كاروباری بازرگانی، ڕایگەیاند، لەگەڵ شاندە توركییەكە پرسی گەشەپێدانی جووڵەی بازرگانی و ئابووریی نێوان توركیا و هەرێمی كوردستان و عێراق باسكراوە.

بابەتە ستراتیژییەكان: شاندی بازرگانان و خاوەنكارانی توركیا داوەتنامەی فەرمییان ئاراستەی وەزارەتی بازرگانی و پیشەسازیی حكومەتی هەرێمی كوردستان كرد، بۆ بەشداریكردن لە لووتكەی وەبەرهێنان و بازرگانی كە بڕیارە لە ناوەڕاستی مانگی ئایاری ئەمساڵ لە توركیا بكرێت.

بۆچی گرنگە: حكومەتی هەرێمی كوردستان بە پێشكەشكردنی بابەتێك لەسەر ڕەوشی بازرگانی، دەرفەتی كار و ئابووریی هەرێمی كوردستان لەو پانێڵەی توركیا بەشدار دەبێت، ئەمەش دەبێتە دەرفەتێكی دیكە بۆ ڕاكێشانی سەرمایەی بیانی بۆ ناوخۆی هەرێمی كوردستان.