عێراق لەناو ئەو وڵاتانەدایە کە زۆرترین پارەی لە کۆچبەرانی دەرەوەی وڵاتەوە بۆ دێتەوە

ئاڤا نیوز

 

سندووقی نێودەوڵەتی بۆ گەشەپێدانی کشتووکاڵی دەڵێت، لە جیهاندا 200 ملیۆن کۆچبەر بۆ کار چوونەتە وڵاتانی دیکە و ساڵانە ملیاران دۆلار ڕەوانەی وڵاتەکانیان دەکەنەوە، کۆچبەرانی عێراقیش ساڵی ڕابردوو 879 ملیۆن دۆلارییان بۆ خێزانەکانیان ناردووەتەوە.

 

ئەوەی پێویستە بیزانیت: بەگوێرەی ڕاپۆرتەکەی ئەو دامەزراوە داراییە، لە جیهاندا ملیارێک مرۆڤ ژیانیان پشتی بەو داهاتە بەستووە کە کەسێکی دەرەوەی وڵاتەکە بۆی دەنێرێتەوە، بە تێکڕاش هەر کۆچبەرێک کە لە دەرەوەی وڵاتی خۆی کار دەکات، مانگانە 200 بۆ 300 دۆلار بۆ خێزانەکانیان دەنێرنەوە.

 

ڕاگەیێنراوی فەرمی: سندووقی نێودەوڵەتی بۆ گەشەپێدانی کشتوکاڵی لە کۆتا ڕاپۆرتی خۆیدا ئاماژەی بەوەشکردووە، ساڵی ڕابردوو ئەو پارەیەی لەڕێگەی کەناڵە فەرمییەکانەوە، کۆچبەران بۆ وڵاتەکانیان ناردووەتەوە بە 685 ملیار دۆلار مەزندە دەکرێت، بەڵام ئەگەر پارەی کەناڵە نافەرمییەکانیش هەژمار بکرێت، پارەکە زۆر لەو بڕە زیاترە.

 

ئەوەشی خستووەتەڕوو، ئەو پارەیەی کۆچبەران دەینێرنەوە بە زۆری دەچێتە ناوچە دوورە دەستەکان لە وڵاتەکانیاندا، ئەوەش بەشێوەیەکی ڕاستەوخۆ کاریگەری ئەرێنیی لەسەر وەبەرهێنان، بوژانەوە و گەشەپێدانی وڵاتەکانیان هەبووە.

 

ئەو وڵاتانەی زۆرترین پارەیان لە کۆچبەرانەوە بۆ دێتەوە:

 

هیندستان: 129.1 مليار دۆلار
مەکسیک: 68.2 مليار دۆلار
چین: 48 مليار دۆلار
فلیپین: 40.2 مليار دۆلار
پاكستان: 33.2 مليار دۆلار

لەسەر ئاستی وڵاتانی عەرەبی، ئەو وڵاتای زۆرترین پارەیان لە کۆچبەرانەوە بۆ دێتەوە:
میسر: 22.7 مليار دۆلار
مەغریب: 12 مليار دۆلار
لوبنان: 5.8 مليار دۆلار
ئوردن: 4.8 مليار دۆلار
یەمەن: 3.8 مليار دۆلار
تونس: 2.8 مليار دۆلار
جەزائیر: 1.94 مليار دۆلار
قەتەر: 1.5 مليار دۆلار
سودان: مليار دۆلار
عێراق: 879 مليۆن دۆلار