لە پەرلەمانی عێراق واژۆ بۆ دەرکردنی هێزەکانی تورکیا کۆدەکرێتەوە

 

ئاڤا نیوز

پەرلەمانتارێکی عێراق ئاشکرای دەکات، دەستکراوە بە کۆکردنەوەی واژۆی پەرلەمانتاران بۆ بڕیاردان لەسەر دەرکردنی سوپای تورکیا لە خاکی عێراقدا.

وێنە گەورەکە: بەهۆی بوونی چەکدارانی پەکەکە لەنێو خاکی عێراق، تورکیا لە ماوەی چەندین ساڵی ڕابردوودا، دەیان بنکەی سەربازیی لەنێو خاکی عێراقدا دروستکردووە، هاوکات ئۆپەراسیۆنی سەربازی و سەدان هێرشی ئاسمانی بۆ سەر پێگەی ئەو چەکدارانە ئەنجامداوە.

ڕاگەیێنراوی فەرمی: مەهدی تەقی ئامرلی، سەرۆکی فراکسیۆنی بەدر لە پەرلەمانی عێراق کە هادی عامری سەرۆکایەتیی دەکات ڕایگەیاند: واژۆمان کۆکردووەتەوە بۆ دەرکردنی هێزەکانی تورکیا لە عێراق، دوای ئەوەی پەکەکە چەکدانانی ڕاگەیاند.

لەلایەکی دیکەوە: یاسر وەتووت، ئەندامی لیژنەی ئاسایش و بەرگریی پەرلەمانی عێراق بە ئاڤا میدیای ڕاگەیاند: لیژنەکەمان کاردەکات بۆ میوانداریکردنی بەرپرسانی حکومی، بەمەبەستی تاوتوێکردنی مەلەفی کۆتاییهێنان بە بوونی سەربازی تورکیا لە ناوخۆی عێراقدا، هیچ پاساوێک بۆ ئەم ئامادەبوونە نییە، بەتایبەتی دوای ئەوەی پەکەکە ڕایگەیاند کە چەک دادەنێت.