لە 48 کاتژمێری داهاتوودا وردبینیکردن لە لیستی مووچەی مانگی دوو تەواو دەبێت

ئاڤا نیوز

لە 48 کاتژمێری داهاتوودا لە وەزارەتی دارایی عێراق وردبینیکردن لە لیستی مووچەی مانگی دوو تەواو دەبێت و دەست بە ڕێکارەکانی ناردنی پارە دەکرێت، چاوەڕوان دەکرێت ئەم هەفتەیە 950 ملیار بۆ تریلۆنێک دینار بنێردرێت.

چیرۆکی سەرەکی: شاندی تەکنیکی وەزارەتی دارایی و ئابووریی هەرێمی کوردستان ماوەی پێنج ڕۆژە لە بەغدایە و هێشتا نەگەڕاوەتەوە. کاریان تەواوکردنی ڕێکارەکانی ناردنی مووچەی مانگی دوو و وەڵامدانەوەی پرسیارەکانی وەزارەتی دارایی عێراقە لەبارەی لیستی مووچە.

لێدوانی فەرمی: کەمێک پێش ئێستا سەرچاوەیەکی باڵا و ئاگاداری وەزارەتی دارایی و ئابووریی هەرێمی کوردستان تایبەت بە ئاڤا میدیای ڕاگەیاند، لە 48 کاتژمێری داهاتوودا وردبینیکردن لە لیستی مووچە تەواو دەبێت ڕەنگە زووتریش، ئینجا دەست بە ڕێککارەکانی ناردنی پارە دەکرێت کە بڕەکەی لەنێوان 950 ملیار بۆ تریلۆنێک دینارە.

یەكێک لە ئەندامانی ئەو شاندەی لە بەغدایە بە ئاڤای گوت، "چاوەڕوان دەکرێت لە چەند ڕۆژی ئایندەدا لەم هەفتەیە دەست بە ناردنی پارەی مووچەی مانگی دوو بکرێت، کەوتووەتە سەر ئەوەی وردبینی و ڕێکارە ئیدارییەکان کەی تەواو دەبن". 

سەرچاوەکەی وەزارەتی دارایی گوتیشی،  ئەگەر هیچ نەیەتە پێشەوە ئەم هەفتەیە پارە دەگات.

ئەمەش بزانە: لەگەڵ ئەوەی پارە خرایە سەر هەژماری هەرێمی کوردستان لە لقی هەولێری بانکی ناوەندی، لە هەرێمی کوردستان دەستبەجێ لیستی مووچەی مانگی دوو ڕادەگەیێنرێت و دەست بە دابەشکردنی دەکرێت.