وەزارەتی دەرەوەی فەرەنسا بۆ ئاڤا: پێشوازی لە پەیامەکەی ئۆجەلان دەکەین

 

ئاڤا نیوز

وەزارەتی دەرەوەی فەرەنسا لەرێگەی ئاڤاوە پێشوازی لە پەیامەکەی عەبدوڵڵا ئۆجەلان دەکات بۆ ڕاگرتنی شەڕ و چەکدانانی پەکەکە، هیوا دەخوازێت ببێتە هۆی هێنانە کایەی پرۆسەیەکی سیاسی گشتگیر لەسەر بنەمای دیموکراسی و یاسا.

وێنە گەورەکە: دوای پەیامەکەی عەبدوڵڵا ئۆجەلان ڕێبەری زیندانیکراوی پەکەکە بەشێوەیەکی کاتی شەڕ لە نێوان تورکیا و پەکەکە ڕاگیراوە کە ماوەی 40 ساڵ بوو بەردەوام بوو و لەسەر ئاستی نێودەوڵەتی وڵاتان پێشوازیان لە هەنگاوەکە کرد.

لێدوانی فەرمی: سەرچاوەیەکی دیپلۆماسی لە وەزارەتی دەرەوەی فەرەنسا بە ئاڤای ڕاگەیاند:

٠ فەرەنسا پێشوازی لە پەیامەکەی عەبدوڵڵا ئۆجەلان دەکات کە داوای لە پەکەکە کردووە چەک دابنێن و گرووپەکە هەڵبوەشێننەوە.

٠ هیوادارین ئەم بانگەوازە ببیسترێت و ڕێزی لێ بگیرێت، بۆ ئەوەی لاپەڕەی توندوتیژی بە شێوەیەکی یەکلاکەرەوە دابخرێت و پرۆسەیەکی سیاسی گشتگیر لەسەر بنەمای دیموکراسی و یاسا کارا ببێت.

٠ فەرەنسا خواستی خۆی دووپاتدەکاتەوە کە کوردەکانی سووریا جێگەی تەواوی خۆیان لە پڕۆسەی ڕاگوزەردا هەبێت کە لە سووریا بەڕێوەدەچێت، هەروەها مافەکانیان وەک مافەکانی هەموو پێکهاتەکانی کۆمەڵگەی سووریا پارێزراو بێت.

ئەوەی پێویستە بیزانیت: لە 27ـی شوبات شاندی ئیمرالی دوای سێیەم جار سەردانیکردنی عەبدوڵڵا ئۆجەلان، ڕێبەری زیندانیکراوی پەکەکە لە ئیمرالی، بانگەوازی ئۆجەلانیان خوێندەوە کە تێیدا داوای کرد "پەکەکە خۆی هەڵبوەشێنێتەوە و سەرجەم گرووپەکانی چەک دابنێت".

باکگراوند: پەکەکە لە 1978-11-27، لە گوندی فیس سەر بە ناحیەی لیجەی ئامەد یەکەم کۆنگرەی خۆی بەست و ئامانجی دامەزراندنی کوردستانێکی گەورەتر بوو، دوای 47 ساڵ لەسەر داوای ڕێبەرەکەیان لە 27ـی شوبات داوای هەڵوەشاندنەوەی کرا و قەندیل داواکەی قبووڵ کرد.