پەرلەمانی عێراق: ئامادەكارییەكان بۆ هەناردەكردنەوەی نەوتی كوردستان تەواو كراون

ئاڤا نیوز

 

لیژنەی نەوت و گاز لە پەرلەمانی عێراق ڕایدەگەیەنێت، سەرجەم ئامادەكارییەكان بۆ هەناردەكردنەوەی نەوتی هەرێمی كوردستان تەواو كراون و بەربەستەكان لادراون.

 

وێنە گەورەكە: بەگوێرەی هەمواری یاسای بودجەی گشتیی عێراق بۆ ساڵی 2025، هەناردەكردنەوەی نەوتی هەرێمی كوردستان لەڕێگەی بەندەری جەیهانی توركیا دەستپێدەكاتەوە، بەپێی هەموارەكەش؛ ڕۆژانە 300 بۆ 325 هەزار بەرمیل نەوت لەڕێگەی كۆمپانیای بەبازاڕكردنی نەوت 'سۆمۆ' ڕەوانە دەكرێت و دەفرۆشرێت.

 

لێدوانی فەرمی: عەلی شەداد، وتەبێژی لیژنەی نەوت و گاز لە پەرلەمانی عێراق بە میدیا عێراقییەكانی ڕاگەیاندووە، هیچ بەربەستێک لەبەردەم هەناردەكردنەوەی نەوتی هەرێمی كوردستان نەماوە و ئامادەکارییەکان بۆ ئەو پرۆسەیە تەواو کراون.

 

زانیاریی زیاتر: وتەبێژی لیژنەی نەوت و گازی پەرلەمانی عێراق ڕوونیشی كردەوە، هەرچەندە بەپێی هەمواری یاسای بودجە، هەرێمی كوردستان پابەندە ڕۆژانە 300 بۆ 325 هەزار بەرمیل نەوت لەڕێگەی سۆمۆوە هەناردە بكات، بەڵام پێدەچێت لە سەرەتادا نەتواندرێت ئەو بڕە نەوتە هەناردە بكرێت و بڕی نەوتی هەناردەكراو 185 هەزار بەرمیل دەبێت، جگەلەوەش هەرێمی كوردستان داوای كردووە بڕی نەوتی بەكارهێندراو بۆ ناوخۆ، لە 45 هەزار بەرمیلەوە بكرێتە 110 هەزار بەرمیل نەوت لەڕۆژێكدا.

 

باكگراوند: ماوەی دوو ساڵە هەناردەكردنی نەوتی هەرێمی كوردستان لەڕێگەی بەندەری جەیهانەوە وەستاوە، بەهۆیەوە زیانی زیاتر لە 25 ملیار دۆلار بەر عێراق و هەرێمی كوردستان كەوتووە.