ئەمریکا نیگەرانە لە لێدوانەکانی زێلێنسکی

 

ئاڤا نیوز

دۆناڵد ترەمپ، سەرۆکی ئەمریکا پێیوایە، تا ئەو کاتەی ئەمریکا پشتگیری بکات، زێلێنسکی ئاشتی ناوێت و ئەوانیش زۆر زیاتر بەرگەی ئەم دۆخە ناگرن.

وێنە گەورەکە: ناکۆکییەکانی ئەمریکا لەلایەک و ئەوروپا و ئۆکراینا لەلایەکی دیکە لەسەر چۆنێتی کۆتاییهێنان بە جەنگی نێوان ڕووسیا و ئۆکراینا هێشتا چارەسەرنەکراون و نەگەیشتوونەتە خاڵی ڕێککەوتن.

لێدوانی فەرمی: ڤۆڵۆدیمێر زێلێنسکی، سەرۆکی ئۆکراینا ڕایگەیاند، کاتی ڕێککەوتن بۆ کۆتاییهێنان بە جەنگی نێوان ڕووسیا و ئۆکراینا هێشتا زۆر زۆر دوورە و پێشبینی دەکات پشتیوانییەکانی ئەمریکا بۆ وڵاتەکەی بەرەوام بێت، سەرەڕای پەیوەندییە خراپەکەی ئەم دواییەی لەگەڵ دۆناڵد ترەمپ سەرۆکی ئەمریکا و ئیدارەکەی.

بۆچوونی لایەنی بەرامبەر: دۆناڵد ترەمپ، سەرۆکی ئەمریکا ڕایگەیاند، ئەمە خراپترین لێدوانە  لە لایەن زێلێنسکییەوە دراوە و ئەمریکاش زۆر زیاتر بەرگەی ناگرێت، ئەمە ئەوەیە کە پێشتریش وتوومە، ئەم کابرایە نایەوێت ئاشتی هەبێت تا ئەو کاتەی پشتگیری ئەمریکای هەبێت، و وڵاتانی ئەوروپاش لە کۆبوونەوەکەیاندا لەگەڵ زێلێنسکی بە ڕوونی ڕایانگەیاند، ناتوانن بەبێ ئەمریکا کاربکەن بۆ پاراستنی ئۆکراینا.

باکگراوند: ئەمە لەکاتێکدایە پەیوەندییەکانی ئەمریکا و ئۆکراینا لە مێژووی ئەو دوو وڵاتەدا لە خراپترین ئاستدایە، دوای ئەو ناکۆکییانەی هەفتەی ڕابردوو لە نێوان دۆناڵد ترەمپ سەرۆکی ئەمریکا و ڤۆڵۆدیمێر زیلێنسکی سەرۆکی ئۆکراینا لە کۆشکی سپی ڕوویاندا.