بۆ هەناردەکردنی خورما عێراق لە پلەی چوارەمی وڵاتانی جیهاندایە

 

ئاڤا نیوز

وەزارەتی کشتوکاڵی عێراق ئاشکرایکرد، ساڵی ڕابردوو 700 هەزار تۆن خورما  کە لە نزیکەی 17 ملیۆن دارخورماوە بەرهەمهاتووە هەناردەی بازاڕەکانی جیهان کراوە.

چیرۆکی سەرەکی: خورمای عێراق، بەهۆی جۆرە جیاواز و تایبەتەکانی، خواستێکی زۆری وڵاتانی جیهانی لەسەرە، وەزارەتی کشتوکاڵی عێراقیش پێشبینی دەکات ئەمساڵ بڕێکی زۆری خورمای خۆماڵی بگاتە بازاڕەکانی ڕۆژهەڵاتی ئاسیا و ئەوروپا.

لێدوانی فەرمی: عەباس مالیکی وەزیری کشتوکاڵی عێراق ڕایگەیاند: ساڵی ڕابردوو 700 هەزار تۆن خورما لە عێراقەوە هەناردەی بازاڕەکانی جیهان کراوە و پێشبینی دەکرێت بەرهەمی خورما بۆ وەرزی ئەمساڵ زیاد بکات.

ئەمەش بزانە: عێراق لە پلەی چوارەمی وڵاتانی جیهاندایە بۆ هەناردەکردنی خورما، ساڵی 2023 نزیکەی 735 هەزار تۆن خورمای هەناردەی دەرەوە کردووە بەڵام لەساڵی 2024 بڕەکەی کەمبووەتەوە بۆ 700 هەزار تۆن.

هۆكاره‌ زانراوه‌كان: وەزارەتی کشتوکاڵی عێراق هۆکاری کەمبوونەوەی ئاستی هەناردەکردنی خورمای خۆماڵی بۆ بازاڕەکانی دەرەوەی وڵات گەڕاندەوە بۆ زیادبوونی خواستی ناوخۆیی لەسەری کە ڕاستەوخۆ کاری کردووەتە سەر ڕێژەی هەناردەکردنی بۆ بازاڕەکانی دەرەوە.