خاوەن پێشانگەکانی ئۆتۆمبێل لە هەولێر لەرێگای ئاڤاوە داوایەکیان هەیە

ئاڤا نیوز

بە هۆکاری ئەوەی پێبژاردن بۆ ئۆتۆمبێلەکانیان کراوە و بۆ هەر ئۆتۆمبێلێک بڕی ملیۆنێک و 80 هەزار دینار سزایان بۆ هاتووەتەوە، ئەمڕۆ ژمارەیەک لە خاوەن پێشانگەکانی ئۆتۆمبێل لە شاری هەولێر ناڕەزاییان دەربڕی و داوایان کرد ئاڤا میدیا کێشەکەیان بۆ بگەیێنێت.

وێنە گەورەکە: هەندێک لە خاوەن پێشانگەکانی ئۆتۆمبێل لە هەولێر، گلەیی ئەوە دەکەن کە لە بەرامبەر ڕاگرتنی ئۆتۆمبێلەکانیان لەبەردەم پێشانگەکان، پۆلیسی هاتووچۆ پێبژاردنیان بۆ دەکات، ئەو ئۆتۆمبێلانەی تابلۆیان هەیە، بە بڕی 30 هەزار دینار سزا دراون، ئەوەانەیشی ژمارەیان نیە و بۆ فرۆشتن لەبەردەم پێشانگەکان دانراون، ملیۆنێک و 80 هەزار دیناریان بۆ هاتووەتەوە.

زانیاریی پەیامنێر: عوبێد هەرکی، پەیامنێری ئاڤا چوەتەوە ناو پێشانگەکان و قسەی لەگەڵ کردوون یەکێکیان وەکو بەڵگە پیشانی پەیامنێری ئاڤای دەدات کە ئۆتۆمبێلی لە شوێنی قەدەغەکراو ڕانەگرتووە، کەچی ملیۆنێک و 80 هەزار دیناری وەک سزای سەرپێچی بۆ هاتووەتەوە، لەسەر پێبژاردنەکەش نووسراوە بەهۆی ڕاگرتن لەشوێنی قەدەغەکراو لەپێشانگەکانی ئۆتۆمبێل. هاوکات دەشڵێت، "من جاری وا هەیە لەو ئۆتۆمبێلەی دەیفرۆشم ملیۆنێک قازانج ناکەم، ئەگەر 30 هەزار دینار بێت باشترە".

لێدوانی فەرمی: عەقید هێمن حەمەدەمین، وتەبێژی بەڕێوەبەرایەتیی پۆلیسی هاتووچۆی هەولێر دەڵێ:

- شوێن بۆ هەموو پێشانگەکان دیاریکراوە، نابێت هیچ ئۆتۆمبێلێک لەسەر شەقام بێت و دەبێت لەسەر رەسیفەکەی خۆت بێت.

- بەپێی یاسا هەر ئۆتۆمبێلێک کە داخلی کوردستان دەبێت، ژمارەیەکی کاتی و مەنەفێستی پێ دەدرێت، دوای دوو مانگ کە ژمارە کاتییەکەت بۆ ئەو ئۆتۆمبێلانە بەست، دەبێت سەردانی پۆلیسی هاتووچۆ بکەیت و ژمارەی لێبدەی،ئەگەرنا ڕۆژانە 10دینار وەک پێبژاردنی دێتە سەر.

- دەبێ ئەو ژمارە کاتییە هەر لەناو پێشانگەکە بە ئۆتۆمبێلەکەوە بێت، هەر کاتێک ئۆتۆمبێلەکە فرۆشرا و گرێبەستی ئەلیکترۆنی کرا، لەو کاتەوە دوو مانگەکە  هەژمار دەکرێت.

- ئەگەر ژمارە کاتییەکەی پێوەبوو، ئەو کاتە پۆلیسی هاتووچۆ پێبژاردنی نەبەستنی ژمارەکەت ناکات، بەڵکو تەنیا پێبژاردنی سەرپێچییەکەت دەکات.