سیسی: ترەمپ دەتوانێت کۆتایی بە گرژی و دوژمنایەتی لە ناوچەکەمان بهێنێت

ئاڤا نیوز

سەرۆککۆماری میسر ڕایدەگەیێنێت، سەرۆکی ئەمریکا دەتوانێت کۆتایی بە گرژی و دوژمنایەتی لە ناوچەکەمان بهێنێت و ئاماژە بۆ ئەوەش دەکات پەیمانی ئاشتی نێوان میسر و ئیسرائیل مۆدێلێکە کە دەبێت پەیڕەوی لێبکرێت بۆ گۆڕینی دۆخی شەڕ بۆ ئاشتی و خۆشگوزەرانی.

وێنە گەورەکە: ئەمڕۆ سێشەممە 4-3-2025، کۆبوونەوەی نائاسایی لووتکەی وڵاتانی عەرەبی بە بەشداری سەرکردەکانی وڵاتانی عەرەبی لە قاهیرە پەیوەست بە دۆخی غەززە و گەیشتن بە بڕیارێکی عەرەبیی یەکگرتوو بەڕێوەچوو.

لێدوانی فەرمی: لە میانی بەڕێوەچوونی کۆبوونەوەکە عەبدولفەتاح سیسی، سەرۆککۆماری میسر گوتارێکی پێشکەشکرد و ئاماژەی بۆ ئەوە کرد،

- "ناوچەکەمان ڕووبەڕووی ئاستەنگی گەورە بووەتەوە کە هەڕەشە لە ئاسایش و سەقامگیری ناوچەکە دەکەن".

- دەستدرێژی بۆ سەر غەززە پەڵەی لەسەر مێژووی مرۆڤایەتی بەجێهێشت، ناونیشانەکەی بڵاوکردنەوەی ڕق و نەبوونی دادپەروەرییە.

- شەڕی تووندی کەرتی غەززە ئامانجی لەناوبردنی ئامرازەکانی ژیان بوو و بژاردەی لە نێوان لەناوبردن و ئاوارەبووندا بە خەڵکی غەززە بەخشی.

- میسر لە یەکەم ڕۆژی شەڕەوە بە هاوکاری قەتەر و براکانمان هەوڵی وەستاندنی شەڕی داوە.

- بە هاوکاری لەگەڵ براکانمان لە فەلەستین کارمان بۆ پێکهێنانی لیژنەیەک لە فەلەستینییە سەربەخۆکان کرد بۆ بەڕێوەبردنی کەرتی غەززە.

- کار لەسەر ڕاهێنانی کادرە ئەمنییەکانی فەڵەستین دەکەین کە لە قۆناغی داهاتوودا دەست بەسەر ئاسایشی کەرتی غەززەدا دەگرن.

- داوای پەسەندکردنی پلانەکەمان دەکەین کە مافی گەلی فەلەستین بۆ ئاوەدانکردنەوەی زێدی خۆیان و مانەوە لەسەر خاکی خۆیان دەپارێزن.

- هۆشداری دەدەین لە لێکەوتەکانی بەردەوامی هێرشەکان بۆ سەر مزگەوتی ئەقسا و تێکدانی دۆخی ئێستا لەوێ.

- ئاشتییەکی ڕاستەقینە بەبێ دامەزراندنی دەوڵەتی فەلەستین نایەتەدی و ئاشتی بە زۆر و بە زەبری هێز ناسەپێنرێت.

- پەیمانی ئاشتی نێوان میسر و ئیسرائیل مۆدێلێکە کە دەبێت پەیڕەوی لێبکرێت بۆ گۆڕینی دۆخی شەڕ بۆ ئاشتی و خۆشگوزەرانی.

- سەرۆک ترەمپ دەتوانێت کۆتایی بە گرژی و دوژمنایەتی لە ناوچەکەمان بهێنێت.