تورکیا: بەندەری جەیهان بۆ هەناردەکردنەوەی نەوتی کوردستان ئامادەیە

ئاڤا نیوز

وەزارەتی نەوتی عێراق ڕایگەیاند، تورکیا ئاگاداریی کردوونەتەوە کە بەندەری جەیهان و بۆری نەوتی عێراق و تورکیا، بۆ دەستپێکردنەوەی هەناردەی نەوتی هەرێمی کوردستان ئامادەن.

وێنە گەورەکە: هەرچەندە لە مانگی ڕابردووەوە هەولێر و بەغدا لەسەر دەستپێکردنەوەی هەناردەی نەوت ڕێککەوتوون، بەڵام کۆمپانیا بیانییەکانی بەرهەمهێنەری نەوتیش لە کوردستان چەند مەرجێکیان هەیە و داوای پارەی پێشوەخت بۆ دەستپێکردنەوەی هەناردەی نەوت دەکەن، بەو هۆیەشەوە تائێستا هەناردەی نەوتی کوردستان دەستیپێنەکردووەتەوە.

لێدوانی فەرمی: باسم محەمەد خوزەیر، بریکاری وەزارەتی نەوتی عێراق بۆ کاروباری دەرهێنانی نەوت بە ڕۆژنامەی سەباحی نیمچە فەرمی ڕاگەیاند:

٠ تورکیا بە فەرمی عێراقی ئاگادار کردووەتەوە کە بەندەری جەیهان ئامادەیە بۆ پێشوازیی لە کەشتییە نەوتییەکان، پرۆسەی پشکنینی بۆری نەوتی عێراق و تورکیاش بۆ هەناردەکردنەوەی نەوتی هەرێمی کوردستان تەواو بووە.

٠ هەموو ئەرکەکانی سەرشانمان جێبەجێکردووە، چاوەڕێی ڕەزامەندی هەرێمی کوردستانین بۆ دیاریکردنی وادەی دەستپێکردنەوەی هەناردەی نەوت بە تێکڕای ڕۆژانە 185 هەزار بەرمیل، دواتریش بڕی هەناردە بۆ ئەو ئاستەی لە یاسای بودجەدا هاتووە بەرزدەکرێتەوە.