مەشعان جبووری: هۆشداری لە ڕوودانی ئاژاوەگێڕی بە سەرکردەکانی عێراق دەدات

ئاڤا نیوز

مشعان جبووری، هۆشداری لەڕوودانی ئاژاوەگێڕی دەدات و دەڵێت، "ئەگەر سەرکردە سیاسییەکانی عێراق گوێ لە ئامۆژگارییەکان نەگرن، ئەوا ڕووبەڕووی هەمان چارەنووسی موعەممەر قەزافی، سەرۆکی پێشووی لیبیا دەبنەوە.

لێدوانی فەرمی: مشعان جبوری، سیاسەتمەداری عێراقی و سەرۆکی پارتی وەتەن لە چاوپێکەوتنێکی تەلەفزیۆنیدا ڕایگەیاند:

- ڕەنگە سەدرییەکان بە دار ڕژێمی ئێستای عێراق بڕوخێنن، هاوکات موقتەدا سەدر سەرۆکی ڕەوتی نەتەوەیی شیعە، لە سوننە مەترسیدارترە بۆ سەرکردەکانی شیعە.

- لەمەودوا ڕێگە بەو هێزە چەکدارانە نادرێت کە دەوڵەت پارەیان بۆ  خەرج بکات و دڵسۆزیشیان بۆ خامەنایی هەبێت، بەڵکو پێویستە سەرجەم هێزەکانی بەرەی مقاوەمە و حەشدی شەعبی تێکەڵ بە هێزە  ئەمنییەکانی عێراق بکرێن.

- جگە لە گرتن و کوشتن، عەرەبی سوننە هیچ دەسکەوتێکیان لە عێراقی نوێ  نەبووە، لەم قۆناغەشدا خوازیاری ئازادکردنی دەستبەسەرکراوان و کشانەوەی هێزە چەکدارەکانی بەرەی مقاوەمەن لە ناوچەکانییان.

- ئەگەر سەرکردە سیاسییەکانی عێراق گوێ لەو هەموو ئامۆژگارییانەی پەیوەستن بە چاکسازی و دووبارە ڕێکخستنەوەی سەربازی نەگرن، ئەوا ڕووبەڕووی هەمان چارەنووسی قەزافی دەبنەوە.