لەدوای شەڕە قسەکەی کۆشکی سپی؛ دانوستانەکانی ئەمریکا و ئۆکراینا دەستپێدەکەنەوە

ئاڤا نیوز

ئەندری یێرماک، یاریدەدەری سەرۆکی ئۆکراینا و مایک والتز، ڕاوێژکاری ئاسایشی نیشتمانی ئەمریکا پەیوەندییەکی تەلەفۆنییان ئەنجامدا و بڕیارە بەرپرسانی هەردوو وڵات گفتوگۆکانیان دەستپێبکەنەوە.

وێنە گەورەکە: ئەمریکا و ئۆکراینا دەیانەوێت پەیوەندییەکانیان ئاسایی بکەنەوە و لەم پێناوەشدا گفتوگۆکانیان لەسەر ئاستی باڵای وڵاتەکانیان دەستپێکردووەتەوە، ئەمەش دوای ڕووداوەکانی هەفتەی ڕابردوو لە نێوان دۆناڵد ترەمپ، سەرۆکی ئەمریکا و ڤۆلۆدیمێر زێلێنسکی، سەرۆکی ئۆکراینا لە کۆشکی سپی دێت.

لێدوانی فەرمی: ئەندری یێرماک ڕایگەیاند:

- لەگەڵ ڕاوێژکاری ئاسایشی نیشتمانی ئەمریکا گفتوگۆمان لەسەر دەستپێکردنەوەی دانوستانەکانی ئەمریکا و ئۆکراینا کردووە، هەروەها باسمان لە هەنگاوەکانی داهاتوو کرد، ئەویش بە ئاراستەی ئاشتییەکی دادپەروەر و بەردەوام.

- بیروڕامان لەبارەی پرسە ئەمنییەکان و یەکخستنی هەڵوێستەکان لە چوارچێوەی پەیوەندییە دووقۆڵییەکانی نێوان ئۆکراینا و ئەمریکا ئاڵوگۆڕ کرد و لە داهاتوویەکی نزیکدا تیمەکانمان کۆدەبنەوە بۆ درێژەدان بەم کارە گرنگە.

باکگراوند: ئەمە لەکاتێکدایە ئەمریکا هاوکارییەکان و پاڵپشتی هەواڵگری و ناردنی کەرەستەی سەربازی بۆ ئۆکراینا ڕاگرت و داوای لە ئۆکراینا کرد بگەڕێتەوە بۆ سەر مێزی گفتوگۆی دەستەبەرکردنی ئاشتی لەگەڵ ڕووسیا.