ئەفسەر و سەربازانی کوردی سوپای عێراق زەوییان پێ دەدرێت

 

ئاڤا نیوز

بە فەرمانی وەزیری بەرگریی عێراق بڕیاردرا بە پێدانی پارچە زەوی بە 8500 ئەفسەر و سەربازی کورد لە بەغداد کە خۆیان دانیشتووی پارێزگاکانی هەرێمی کوردستانن.

چیرۆکی سەرەکی: کۆتایی ساڵی ڕابردوو ئەنجوومەنی وەزیرانی عێراق بڕیاریدا زەوی بداتە کارمەندانی وەزارەتی بەرگری، لەوانەش سەرباز، ئەفسەر، پلەدار و فەرمانبەران، بڕیاریشیدا وەزارەتی بەرگری خۆی سەرپەرشتی دابەشكردنی پرۆسەکە لە بەغدا و پارێزگاکان بکات.

نووسراوی فەرمی: بە گوێرەی نووسراوێکی فەرمی کە واژۆی سابت عەباسی، وەزیری بەرگریی عێراقی لەسەرە بڕیاردراوە ئەو کارمەندانەی وەزارەت کە دانیشتووی پارێزگاکانی هەرێمی کوردستانن و ژمارەیان (703) ئەفسەرەو بە گشتی ژمارەیان هەشت هەزار و 500 ئەفسەر و سەرباز دەبێت، بڕیاری پێدانی پارچە زەوی لە بەغدا بیانگرێتەوە.

ئەوەی پێویستە بیزانیت: پێشتر لە 22ـی مانگی 1، سابت عەباسی، وەزیری بەرگریی عێراق لەبارەی دابەشکردنی زەوی بەسەر کارمەندانی وەزارەتەکەیان ئەوانەی نیشتەجێی هەرێمی کوردستانن ڕایگەیاندبوو:

٠ ئێمە ناتوانین لە شوێنی خۆیان زەوییان بۆ تەرخان بکەین، لە پارێزگاکانی هەرێم یاسا و ڕێنمایی هەیە، بۆیە سەربازە کوردەکان لە پارێزگاکانی دیکە زەوییان پێدەدرێت لەوانەش بەغدا، ئێستا تاوتوێی بڕیارەکە دەکەین کە زیانمەندبووانی برا و ڕۆڵەکانی کوردمان بگرێتەوە لەو پارێزگایانەی کە ئێمە زەوی زیادەمان هەیە تا لەوێ پێیان بدرێت لەناویشیاندا لە بەغدا، ئامانجی ئێمە و حکومەتەکەشمان ئەوەیە هەموو ئەو عێراقییانەی شایستەن شوێنی شیاوی خۆیان پێبدرێت.