خۆپێشاندەرانی مەکسیک دەرگای کۆشکی سەرۆک دەشکێنن

ئاڤا نیوز

 

بەهۆی دیارنەمانی چەند خوێندکارێک، خۆپێشاندەرانی مەکسیک هەڵیانکوتایە سەر کۆشکی سەرۆک و لەسەر دیواری دەرەوە بۆیان نووسی، دەمانەوێت گفتوگۆ بکەین. 

 

چیرۆکی سەرەکی: دە ساڵ لەمەوبەر، 43 خوێندکار لە ڕووداوێکی تەمومژاویدا دیار نامێنن و تاوەکو ئێستا بێسەروشوێنن، لە بەرامبەر ئەو کارەدا، ڕۆژی چوارشەممە خۆپێشاندەرانی مەکسیک هەڵیانکوتایە سەر کۆشکی سەرۆک و داوای دادپەروەرییان کرد. 

 

چی ڕوویدا؟ چەند خۆپێشاندەرێک بە ‘پیکاب’ خۆیان بە دەرگەی کۆشکی سەرۆککۆماری ئەو وڵاتە کێشا و شکاندییان، هەر ئەوەش نا، بە دار و بەرد بەشێک لە پەنجەرەکانیشیان شکاند. 

 

لێدوانی فەرمی: ئەندرێس مانوێل لۆپێز ئۆبرادۆر، سەرۆککۆماری مەکسیک لەبارەی ئەو ڕووداوەوە ڕایگەیاند: “خۆپیشاندەران دەیانەوێت ئێمە بە تووندوتیژیی وەڵام بدەینەوە، بەڵام وا ناکەین چونکە سەرکوتکار نین، دەرگاکەش چاک دەکرێتەوە و کێشە نییە”.

 

لەلایەکی دیکەوە: هەرچەندە دەرگای کۆشکی سەرۆک و بەشێک لە پەنجەرەکان شکێنراون، بەڵام گوتەبێژی نووسینگەی سەرۆکی مەکسیک ڕایگەیاندووە، خۆپێشاندەران تەنها لە لای دەروازەکەوە بوون و نەهاتوونەتە نێو کۆشکەوە.