شێخ دارا: سەرەتای هەفتەی داهاتوو بارانی  چڕ عێراق دەگرێتەوە

ئاڤا نیوز
 
شەپۆلی نزمە پاڵەپەستۆی دەریای سپی ناوەڕاست لە عێراق نزیكبووەتەوە و سەرەتای هەفتەی داهاتوو ئەگەری هەورە بروسكە و تەرزە و لافاو هەیە و ناوچەكانی ئیدارەی گەرمیانیش دەگرێتەوە.

لێدوانی فەرمی: شێخ دارا، پێشكەشكاری كەشوهەوا لە ئاڤا میدیا ڕایگەیاند، شەپۆلێكی چڕی بارانبارین ناوچەكانی عێراق دەگرێتەوە بە ئیدارەی گەرمیانەوە، ئەگەری دروستبوونی لافاو لەو ناوچانە هەیە.

ئەوەی پێشبینی دەكرێت: شێخی كەشناسی پێشبینی دەكات،

- بارانبارین ناوچە جیا جیاكانی هەرێمی كوردستانیش بگرێتەوە و بە بڕی جیاواز باران ببارێت.

- لەڕووی دیاریكردنی كاتەكەی؛ ڕۆژی شەممە دەستپێدەكات و كاریگەریی شەپۆلەكە تا ڕۆژی دووشەممە بەردەوام دەبێت.

- لە ناوچەكانی دەوروبەری پێنجوێن، بیارە و تەوێڵە، حاجی ئۆمەران، چیاكانی گارە و پێرس و حەسەن بەگ بەفر دەبارێت.

- هاوكات پلەكانی گەرما چوار بۆ پێنج پلە دادەبەزێت.

بۆچی گرنگە: ئەو شەپۆلی بارانبارینەی هەفتەی داهاتوو، مەترسی وشكەساڵی و كەمی ئاو بۆ ئاودێریی و كشتوكاڵ، ناهێڵێت. ئاستی ئاوی بەنداوەكانیش بەرز دەكاتەوە.

زانیاریی زیاتر: لەبارەی درەنگكەوتنی ئەو شەپۆلە بارانەی كە بڕیاربوو ناوچەكە بگرێتەوە، شێخ دارا ئاماژە بەوە دەكات، پێشبینیی كەشوهەوا سەخت بووە بەو پێیەی گۆڕانكارییەكان خێرا و چاوەڕواننەكراون.