لە بەغدا کۆبوونەوەی لوتکەی عەرەبی بەڕێوەدەچێت

ئاڤا نیوز

 

لیژنەی ئاسایش و بەرگریی پەرلەمانی عێراق، ڕێکارە ئەمنییەکانی بۆ کۆبوونەوەی لوتکەی عەرەبی ئاشکرا کرد و دەڵێت، "ڕێگاوبانەکان داناخرێن و قەدەغەی هاتووچۆش ناکرێت".

 

وێنە گەورەکە: بڕیارە 17-5-2025، لوتكەی وڵاتانی عەرەبی بەئامادەبوونی بەرپرسانی باڵای زۆربەی وڵاتانی عەرەب لە بەغدای پایتەخت بەڕێوە بچێت، ئەوەش دوای ئەو گفتوگۆیانە هات کە وەزیری دەرەوەی عێراق لەو بارەوە لە قاهیرە ئەنجامیدا.

 

لێدوانی تایبەت: ئەسکەندەر وەتوت، ئەندامی لیژنەی ئاسایش و بەرگری بە ئاڤا میدیای ڕاگەیاند: پلانێکی ئەمنیی توکمە بۆ ڕۆژی کۆبوونەوەی لوتکەی عەرەبی لە بەغدای پایتەخت داڕێژراوە بۆ سەرخستنی کارەکانی لوتکەکە و پاراستنی ژیانی بەشداربووان. 

 

زانیاریی زیاتر: "بەگوێرەی پلانەکە بەهیچ شێوەیەک ڕێگاوبان و شەقامەکان داناخرێن، قەدەغەی هاتووچۆش ناکرێت و ڕۆژی ئەنجامدانی لوتکەکەش دەکەوێتە ڕۆژی شەممەوە کە لەبنەڕەتدا پشووی فەرمییە." ئەسکەندەر وەتوت وادەڵێت.

 

ئەمەش بزانە: پێشتر لە ساڵانی 1978، 1990 و 2012 سێ جار لوتکەى کۆمکارى عەرەبی لە بەغدا بەڕێوەچووە.