حکومەتی عێراق دامەزراندنی نوێ ڕادەگەیێنێت

 

 

ئاڤا نیوز

ئەنجوومەنی ڕاژەی گشتیی عێراق ئاشکرای کرد، لە دوو ساڵی ڕابردوودا زیاتر لە 43 هەزار دەرچووی خوێندنی باڵا و یەکەمەکان دامەزراون، هاوکات ڕێکارەکانی تەواوکردنی دامەزراندنی نزیکەی 6 هەزار دەرچووی دیکە دەستپێکراون.

وێنە گەورەکە: حکومەتی عێراق ئەنجوومەنی ڕاژەی ڕاسپاردووە بە دامەزراندنی ئەو دەرچووانەی یاسای 59 و 67ـی ساڵی 2017 دەیانگرێتەوە، کە تایبەتن بە دامەزراندنی هەڵگرانی بڕوانامەی باڵا و یەکەمەکانی زانکۆ و پەیمانگەکان لە وەزارەتەکانی خوێندنی باڵا و توێژینەوەی زانستی، پەروەردە و ڕۆشنبیری و هەردوو دیوانی وەقفی شیعە و سوننە.

ڕاگەیێنراوی فەرمی: سەعد لامی، وتەبێژی ئەنجوومەنی ڕاژەی گشتیی عێراق ڕایگەیاند: پرۆسەی دامەزراندنی ئەو دەرچووانە لە ساڵی 2023 دەستیپێکردووە، زیاتر لە 43 هەزار دەرچووی خاوەن بڕوانامەی باڵا و یەکەمەکان دامەزراون، لە ساڵی 2024ـیشدا زیاتر لە 17 هەزار دەرچوو دامەزراون.

گوتیشی، لە ئێستادا کار لەسەر دامەزراندنی 5 هەزار و 903 کەس دەکرێت لە دامەزراوە حکومییەکاندا.