ئەمساڵ پڕۆژەی ڕووناكی لە سەنتەری هەر چوار پارێزگاکەی هەرێمی كوردستان جێبەجێ دەكرێت

ئاڤا نیوز

 

بەڕێوەبەرێكی گشتیی كارەبای سلێمانی وردەكاریی جێبەجێكردنی پڕۆژەی ڕووناكی لە شاری سلێمانی دەخاتە ڕوو و ئاشكراشی دەكات كە ئەمساڵ پڕۆژەی ڕووناكی لە سەنتەری هەر چوار پارێزگای هەرێمی كوردستان جێبەجێ دەكرێت.

 

بۆچی گرنگە: بە جێبەجێکردنی پڕۆژەی ڕووناكی، كە بریتییە لە دابینكردنی کارەبای 24 کاتژمێری، هەزاران مۆلیدەی گەڕەک و ماڵان لە سەرتاسەری هەرێمی کوردستان دەکوژێندرێنەوە و ئەمەش کاریگەریی ڕاستەوخۆی ئەرێنیی لەسەر ژینگە دەبێت.

 

لێدوانی فەرمی: ئەندازیار ئەنوەر حەمەسعید، بەڕێوەبەری گشتیی کارەبای سلێمانی ڕایگەیاند:  نزیكەی ساڵێكە كار لە پڕۆژەی ڕووناكی دەكەین و بە خۆشحاڵییەوە ڕۆژی 7-3-2025، پڕۆژەی ڕووناكی لە شاری سلێمانی چووە باری جێبەجێكردنەوە و لە قۆناغی یەكەم نۆ هەزار هاوبەشی كارەبا سوودمەند دەبن.

 

زانیاریی زیاتر: لەبارەی کاتی جێبەجێکردنی پرۆژەکە لەهەر چوار پارێزگاکەی هەرێمی کوردستان، ئەندازیار ئەنوەر حەمەسەعید، گوتیشی، ئەم پڕۆژەیە، پڕۆژەیەكی گرنگی حكومەتی هەرێمی كوردستانە بۆئەوەی لەمەودوا 24 كاتژمێری بەردەوام كارەبا بۆ هاونیشتمانیان دابین بكرێت، بەپێی ئەو پلانەی كە لە پڕۆژەی ڕووناكی دانراوە، تاوەكوو كۆتایی ئەمساڵ لە سەنتەری هەر چوار پارێزگاکەی هەرێمی كوردستان پرۆژەی ڕووناكی جێبەجێ دەكرێت.