سوودانی بۆ پەرلەمانتارێکی کورد: ئەم هەفتەیە مووچەی مانگی دوو دەنێرین

ئاڤا نیوز

محەممەد شیاع سوودانی، سەرۆکوەزیرانی عێراق، لە وەڵامی پرسیارێکدا لەبارەی مووچەی مانگی دووی مووچەخۆرانی کوردستان دەڵێت ئەم هەفتەیە دەینێرن.

چیرۆکی سەرەکی: ئەمڕۆ شەممە بەبۆنەی  8ـی مارس ڕۆژی جیهانیی ئافرەتان، لیژنەی خێزان و منداڵان و ژنان لە پەرلەمانی عێراق سەردانی سوودانییان کردووە و گفتوگۆیان لەبارەی دۆخی ژنان و پلانی حکومەت بۆ باشترکردنی کردووە.

لێدوانی فەرمی: سروە محەممەد، پەرلەمانتاری کورد جێگری سەرۆکی لیژنەکەیە، بە ئاڤای وت لە کۆبوونەوەکەدا لەبارەی مووچە پرسیاری لە سوودانی کردووە و پێی گوتووە: بارودۆخی فەرمانبەرانی کوردستان خراپە، لەکاتێکدا ئێستا مانگی سێیە هێشتا مووچەی مانگی دوو نەنێردراوە، لە وەڵامدا وتی ئەم هەفتەیە دەینێرین.

باکگراوند: بەگوێرەی ڕێککەوتنی نێوان هەولێر و بەغدا کە سەرەتای ئەمساڵ کرا، دەبێت مووچەی هەر مانگێک لەکاتی خۆیدا بنێردرێت، بەڵام ئێستا مووچەخۆرانی هەرێمی کوردستان لەنێو مانگی سێ دان، کەچی تائێستا مووچەی مانگی دوو نەنێردراوە.