عێراق دوو تۆمەتباری "دزیی سەدە" لە دەرەوە دەگەڕێنێتەوە

 

ئاڤا نیوز

دەستەی دەستپاکی عێراق، دوو تۆمەتباری "دزیی سەدە" لە وڵاتی کوێت دەگەڕێنێتەوە.

وێنە گەورەکە: بەهۆی دۆسیەی ئاسانكاریكردن بۆ بردنەدەرەوەی بڕی 2.5 ملیار دۆلار لە بانکی ڕافیدەین وەک یەكێک لە گەورەترین گەندەڵی دارایی لە عێراق کە بە "دزیی سەدە" ناسراوە، تا ئێستا چەندین کەس دەستگیرکراون و دراونەتە دادگا.

ڕاگەیێنراوی فەرمی: : دەستەی دەستپاکی عێراق لە ڕاگەیێنراوێکدا ڕایگەیاند: بەڕێوەبەری ڕاسپێردراوی کۆمپانیایەکی تایبەت بۆ بازرگانی گشتی و بەڵێندەرایەتی و بریکارەکەی کە لە دۆسیەی دزینی پارەی باجدا تۆمەتبار بوون لە وڵاتی کوێت دەستگیرکراون و گەڕێنراونەتەوە عێراق.

دەستەکە ئاماژەی بەوەشکردووە، ڕۆڵی ئەوان لە دۆسیەکەدا وەرگرتنی بڕە پارەیەکی زۆر بووە بە مەبەستی ئاسانکاری بۆ ڕێکارەکانی خەرجکردنی پارەی دزراو.

زانیاریی زیاتر: پێشتر دادگای لێکۆڵینەوەی دووەمی کەرخ فەرمانی دەستگیرکردنی بۆ تۆمەتباران دەرکردبوو.

ئەوەی پێویستە بیزانیت: لە ساڵی 2022، دزینی سێ تریلیۆن دیناری عێراقی کە دەکاتە دوو ملیار دۆلار و نیو لە دەستەی باج ڕاگەیێنرا، نوور زوهێر، بازرگان و هەیسەم جبووری، پەرلەمانتاری پێشووی عێراق بە تۆمەتباری سەرەکیی دزییەکە کە بە "دزیی سەدە" ناسراوە، دادەنرێن لەگەڵ چەندین تۆمەتباری دیکە.

ئەمەش بزانە: هەیسەم جبووری پێشتر فەرمانی سێ ساڵ زیندانیکردنی بۆ دەرچوو بوو، بەڵام دوای ئەوەی لە 21ـی مانگی 1ـی ئەمساڵ، پەرلەمانی عێراق هەمواری یاسای لێبوردنی گشتیی پەسەند کرد، هەیسەم جبووری بەر لێبوردنی گشتی کەوت.