تەیف سامی تێبینی هەیە و شاندە تەکنیکییەکە لەبارەی مووچە دەچێتەوە بەغدا

ئاڤا نیوز

تەیف سامی، وەزیری دارایی عێراق پەیوەست بە مانگی دوو چەند تێبینییەکی نوێی لەبارەی لیستی مووچە و پابەندییەکانی حکومەتی کوردستان هەیە، بۆیە شاندە تەکنیکییەکەی کوردستان جارێکی دیکە دەچێتەوە بەغدا.

وێنە گەورەکە: هەرچەندە لە هەرێمی کوردستان ئامادەکردنی لیستی مووچە کراوەتە ئەلیکترۆنی و بە سیستەمی پەیرۆڵ ئامادە دەکرێت، بەڵام لە وەزارەتی دارایی عێراق بەهەمانشێوەی پێشوو و بە تەقلیدی ڕێککارەکان دەکرێن ئەمەش کاتێکی زۆری دەیەوێت.

ئەوەی پێویستە بیزانیت:  شاندێکی تەکنیکی وەزارەتی دارایی و ئابووریی کوردستان بۆ مووچەی مانگی دوو ماوەی هەشت ڕۆژ  لە بەغدا بوو، دوای وەڵامدانەوەی سەرجەم پرسیارەکان لەبارەی لیستی مووچە و تەواوکردنی ڕێککارەکان، ڕۆژی پێنجشەممە 7ی مانگ گەڕانەوە هەولێر، بەڵام بەهۆی هەبوونی چەند پرسیار و تیبێنییەکی نوێی تەیف سامی، ناچارن ئەم هەفتەیە دووبارە بچنەوە بەغدا.

زانیاریی بەدەستهاتوو: شاندەکە پێکدێت لە ڕێباز عەباس، ڕاوێژکاری وەزارەتی دارایی، کۆڤان تەحسین، بەڕێوەبەری گشتیی ژمێرکاری، مریەم عوسمان، بەڕێوەبەری گشتیی خانەنشینی و ژمارەیەک لە بەڕێوەبەران لایەنە پەیوەندیدارەکانی مووچە، ئاڤا زانیویەتی سبەی یەکشەممە کاتژمێر 07:00ی ئێوارە بەرەو بەغدا بەڕێدەکەون، وەڵامی سەرجەم پرسیار و سەرنجەکان دەدەنەوە، دوای ئەوەی تەیف سامی بەرچاوڕوونی پێویستی پێدرا ئینجا بڕیار لە ناردنی مووچە دەدات.

لەلایەکی دیکەوە: ئەمڕۆ شەممە محەممەد شیاع سوودانی، سەرۆکوەزیرانی عێراق لە وەڵامی پرسیاری پەرلەمانتاری کورد سروە محەممەد کە جێگری سەرۆکی لیژنەی خێزان و منداڵان و ژنانە لە پەرلەمانی عێراق و بەبۆنەی 8ی مارس سەردانیان کردبوو، لەبارەی مووچەی مانگی دوو گوتوویەتی  ئەم هەفتەیە دەینێرن.