موقتەدا سەدر سەرکۆنەی ڕووداوەکانی سووریا دەکات

ئاڤا نیوز

 

ڕابەری بزووتنەوەی نیشتمانیی شیعە سەرکۆنەی شەڕ و گرژییەکانی ئەم دواییەی سووریا و بە ئامانجگرتنی عەلەوییەکان دەکات، هاوکات داوا لە حکومەتی نوێی سووریا دەکات دووربکەوێتەوە لە "توندوتیژی و تائیفەگەری".

 

ڕاگەیێنراوی فەرمی: موقتەدا سەدر، ڕابەری بزووتنەوەی نیشتمانی شیعە لە تۆڕی "ئێکس" ڕایگەیاند: هەواڵی دڵتەزێنمان لە سووریاوە پێدەگات، کە حکومەتی نوێ، عەلەوییەکان دەکاتە ئامانج، ڕەنگە ببێتە پاکتاوکردنی تائیفی. سەدر داوای لە حکومەتی سووریا کرد دووربکەوێتەوە لە توندوتیژی بۆ ئەوەی تۆمەتبار نەکرێن بە داعش و تیرۆریست.

 

زانیاریی زیاتر: هاوکات سەدر داوا لە پێکهاتەی عەلەوەی دەکات، بە ژیرانە و وریاییەوە مامەڵە بکەن بۆ پاراستنی یەکڕیزیی سووریا و دروستنەکردنی پاساو بۆ توندڕەوەکان و بەدەستەوەنەدانی دەرفەت بۆ ئەوانەی لە چاوەڕوانیدان و هەوڵی داگیرکردنی سووریا دەدەن، وەک "ئیسرائیل و لایەنگرانیان".

 

ئەوەی پێویستە بیزانیت: پێنجشەممەی ڕابردوو، شەڕ لەنێوان چەکدارانی عەلەوی و هێزە ئەمنییەکانی سووریا دروست بوو لە کەناراوەکانی سووریا، کە بە "توندوتیژترین" شەڕ دادەنرێت لە دوای ڕووخانی ڕژێمی بەشار ئەسەد لە 8ـی کانوونی دووەمی 2024.

 

ژمارەکان وادەڵێن: بەگوێرەی ئامارەکان بەهۆی شەڕ و ئاڵۆزییەکانی ئەمدواییانەوە تاوەکو ئێستا هەزار و 18 کەس کوژراون.