لەسەر بڵاوکردنەوەی بۆنێکی ناخۆش لە بازیان دوو کەس دەستگیرکران

ئاڤا نیوز

 

بۆنێکی ناخۆش لە ڕۆژانی ڕابردوودا لە سنووری ناحییەی بازیان لە پارێزگای سلێمانی بڵاوبووەوە، بەوهۆیەش دوو هاووڵاتی دەستگیر کران.

 

بابەتی سەرەکی: چەند ڕۆژێکە بۆنێکی ناخۆش و بێزارکەر لە سنووری ناحییەی بازیان لە سنووری پارێزگای سلێمانی بڵاوبووەتەوە، ئەمەش دانیشتووانی سنوورەکەی بێزار کردووە، بۆیە دەزگا ئەمنییەکانی سنوورەکە دەستیان بە لێکۆڵینەوە لە بابەتەکە کرد.

 

بڵاوکراوەی فەرمی: بەڕێوەبەرایەتی پۆلیسی دارستان و ژینگەی پارێزگای سلێمانی ڕایگەیاند: دوای لێکۆڵینەوە لە بابەتەکە دەرکەوت دوو کەس ماددەی 'کبریت' لە زەوییەک دەسووتێن، بۆیە ئاسایشی بەردەقارەمان دەستگیریکردن و ڕادەستی بنکەی پۆلیسی دارستان و ژینگەی بازیانیان کردن.

 

خاڵە نەرێنییەکان: کبریت ماددەیەکی کیمیاییە و سووتاندنی دەبێتە مەترسی بۆ سەر پیسبوونی ژینگە و بۆنێکی ناخۆشی لێ دروست دەبێت.

 

زانیاریی زیاتر: پەڕاوی لێکۆڵینەوە بۆ تۆمەتبارەکان کراوەتەوە و ڕادەستی دادوەر کراون، بۆ ئەوەی ڕێکاری یاساییان بەرامبەر بگیرێتەبەر.