کۆمیسیۆنی عێراق: دەمانەوێت هەڵبژاردنی داهاتوو ڕێژەی بەشداری بۆ نزیکەی 70% بەرزبکەینەوە

ئاڤا نیوز

 

کۆمیسیۆنی هەڵبژاردنەکانی عێراق دەڵێت، پرۆسەی نوێکردنەوەی تۆماری دەنگدەران بە چڕی بەردەوامە و دەیانەوێت بە گرتنەبەری ڕێکاری فراوان گەرەنتی پاک و بێگەردی پرۆسەکە بکەن، تا 20 ملیۆن دەنگدەر بهێننە سەر سندوقەکانی دەنگدان.

 

ئەوەی پێویستە بیزانیت: لە هەڵبژاردنی ئەنجوومەنی پارێزگاکانی عێراق کە کۆتایی ساڵی 2023 بەڕێوەچوو، لە کۆی 26 ملیۆن دەنگدەر تەنیا  6 مليۆن و 600 هەزار کەس دەنگیاندا و ڕێژەی بەشداریی 25% بوو، ئەوەش نیشانەی پرسیاریی لەسەر متمانەی هاووڵاتیان بە کۆی پرۆسەی هەڵبژاردن لە عێراق دروست کرد.

 

لێدوانی فەرمی: عیماد جەمیل، سەرۆکی تیمی ڕاگەیاندن لە کۆمیسیۆنی هەڵبژاردنەکانی عێراق بە ڕۆژنامەی سەباحی نیمچە فەرمی ڕاگەیاند، کۆمیسیۆن لە ئامادەکارییەکانی بۆ هەڵبژاردنی پەرلەمانی عێراق بەردەوامە و ئێستا بە چڕی کار لەسەر پرۆسەی نوێکردنەوەی تۆماری بایۆمەتری دەکەن.

 

کاریگەری و لێکەوتەکان: کۆمیسیۆن خواستی ئەوەی هەیە بە ڕێکارەکانی، دڵنیایی بە هاووڵاتیان بدات و متمانە بۆ پرۆسەی دەنگدان بگەڕێنێتەوە، تا لانیکەم 20 ملیۆن دەنگدەر بێنە سەر سندوقەکانی دەنگدان، ئەوەش نزیکەی 70%ی ڕێژەی بەشداریی لە دەنگدان دەکات.