ئەپیکۆر: مەرجمان بۆ هەناردەکردنەوەی نەوتی کوردستان هەیە

ئاڤا نیوز

کۆمپانیا نێودەوڵەتییەکان مەرجیان بۆ دەستپێکردنەوەی هەناردەی نەوتی کوردستان هەیە و دەڵێن دەبێت قەرەبووی ڕابردوو بکرێنەوە کە بڕەکەی یەک ملیار دۆلارە، بۆ داهاتووش گەرەنتییان پێبدرێت کە پارەیان نافەوتێت، تاوەکو ئێستاش لەنێوان ئەوان  و هەردوو حکومەتی کوردستان و عێراق هیچ ڕێککەوتنێک نەکراوە.

وێنە گەورەکە: سەرەڕای هەموارکردنەوەی یاسای بودجەی عێراق و دیاریکردنی 16 دۆلار بۆ کۆمپانیاکان لەبەرامبەر تێچووی دەرهێنانی هەر بەرمیلێکی نەوت، بەڵام تاوەکو ئێستا هەولێر و بەغدا و کۆمپانیاکان نەگەیشتوونەتە ڕێککەوتن، ئەمە لەکاتێکدایە لەڕووی تەکنیکییەوە هیچ گرفتێک نەماوە، بۆری ئامادەیە و تورکیاش ئامادەیی خۆی دەربڕیوە.

ڕاگەیێنراوی فەرمی: کۆمەڵەی پیشەسازی نەوتی کوردستان (ئەپیکۆر) ڕایگەیاند، ئەگەر ڕەچاوی مەرجەکانمان بکرێت و داواکارییەکانمان جێبەجێ بکرێن، کۆمپانیاکان ئامادەن بۆ دووبارە دەستپێکردنەوەی هەناردەی نەوت لەڕێگەی بەندەری جەیهانی تورکیاوە.

٠ دەستپێکردنەوەی هەناردەکردنی نەوتی هەرێمی کوردستان پێویستی بە ڕێککەوتنی دادپەروەرانە و شەفاف هەیە کە گەرەنتی پارەدان و جێبەجێکردنی شەفافانەی بڕگەکانی یاسای بودجەی عێراق و چارەسەرکردنی دواکەوتنی پارەدان لەخۆبگرێت.

٠ گەرەنتیکردنی پێدانی پارەی هەناردەکردنی نەوتی ڕابردوو و داهاتوو. کۆمپانیاکان پێویستیان بە ڕێکەوتنی فەرمی هەیە لەگەڵ کڕیارانی هەر نەوتێکی هەناردەکراو، کە مەرج و ڕێساکانی دیاری بکات، گەرەنتی ئەوە بکرێت کە کۆمپانیاکان پارەی تەواو بۆ نەوتەکە وەربگرن تەنانەت ئەگەر بە دوو بەشیش بێت.

٠ دەبێت ڕێککەوتنەکان بخرێنە بواری جێبەجێکردنەوە، کۆمپانیاکان پارەی ئەو نەوتەیان پێ بدرێت کە هەناردەیان کردووە، بەڵام لە نێوان مانگی تشرینی یەکەمی 2022 تا ئازاری 2023 پارەکانیان پێنەدراوە. ڕاستەوخۆ و شەفاف ئەم پارانە دەبێت بدرێت بە کۆمپانیاکان، بەبێ نێوەندگیری یان دواکەوتن.

٠ پاراستنی مەرجە بازرگانی و ئابوورییەکانی گرێبەستی هاوبەشی بەرهەمهێنان. گرێبەستی کۆمپانیاکانی ئێستا لەڕووی یاساییەوە دروستن و مەرجەکانیان دەبێت جێبەجێ بکرێن. لە چوارچێوەی گرێبەستەکانی هاوبەشی بەرهەمهێناندا دەبێت ڕێز لە مۆدێلی ئابووری بگیرێت.

لێدوانی فەرمی: مایڵز کاگینز، گوتەبێژی ئەپیکۆر دەڵێت، کۆمپانیاکانی ئەندامی ئەپیکۆر ئامادەن لەگەڵ هەموو لایەنە پەیوەندیدارەکان کۆببنەوە و ڕێککەوتنی پێویست بکەن بۆ دەستپێکردنەوەی هەناردەکردنی نەوت. جەختکردنەوەی محەممەد شیاع سوودانی و حکومەتی ئەمریکاشی لەسەر هەناردەکردنەوەی نەوت لەڕێگەی بۆری کوردستان - تورکیاوە بەرزنرخاند.

باکگراوند: پێنجشەممەی ڕابردوو 2025-03-06، وەزارەتی سامانە سرووشتییەکانی کوردستان و نوێنەری کۆمپانیاکان و وەزارەتی نەوتی عێراق لە بەغدا کۆبوونەوە، بەڵام هیچ چارەسەرێک نەدۆزرایەوە و هیچ ڕێککەوتنێک نەکرا، بڕیارە ئەم هەفتەیە کۆبوونەوەیەکی دیکەی سێقۆڵی بکەن بە ئامانجی ڕێککەوتن و نەهێشتنی بەربەستەکان.