خانەوادەی بەشدار بازیانی داوا لە قوباد تاڵەبانی دەکەن کوڕەکەیان ئازاد بکات

 

ئاڤا نیوز

خانەوادەی ڕۆژنامەنووس بەشدار بازیانی لە بارەی سۆراخی کوڕەکەیان لەڕێگەی ئاڤاوە پەیامێکیان بۆ قوباد تاڵەبانی، جێگری سەرۆکوەزیران هەیە و داوا دەکەن ئازاد بکرێت.

چیرۆکی سەرەکی: نزیکەی 10 ڕۆژە ڕۆژنامەنووس بەشدار بازیانی لە ئاسایشی سلێمانی ڕاگیراوە و هێشتا هیچ کەسێک لە خانەوادەکەی یان کەسێکی نزیکی نەیتوانیووە بچنە لای و بینینن. وەک خۆیان دەڵێن هەر ئەمڕۆ کەسوکارەکەی چوونەتە زیندانی ئاسایش و ڕێگەیان پێ نەدراوە بینینن.

لێدوانی فەرمی: خانەوادەکەی دەڵێن، لە یەکەم ڕۆژەوە هیچ گۆڕانکارییەک لە کەیسەکەی ڕووینەداوە، دەچینە ئاسایش، هەر دەڵێن لەژێر لێکۆڵینەوەیە. هیچی نوێمان پێ ناڵێن. تەنیا هێندە نەبێت لەڕێگای پەیوەندییەکانی خۆمان ئەوەمان بیستووە چەندین تۆمەتییان بۆ دروستکردووە، لەوانە گوایە پەیوەندی هەبووە بە چەند کەسێک کە دژی یەکێتی بن، یەکێکی دیکە لە تۆمەتەکان گوایە زانیاری داوە بە وەزیرێک. خانەوادەکەی دەڵێن بەڵام ئەمانە هیچی ڕاست نییە.

زانیاریی زیاتر: خانەوادەی ئەو ڕۆژنامەنووسە دەڵێن، باوکمان لە ڕێکخستنەکانی یەکێتی کاری کردووە و بەعس ئەشکەنجەی داوە و شەهیدی ئەو حزبەیە، ئامۆزا و پورزامان هەر شەهیدی ئەو حزبەن، بۆیە داوا لە قوباد تاڵەبانی دەکەین. کەیسەکە لای ئەوە و ئەو ئاگاداری هەموویەتی. وەک برازای خۆی مامەڵەی لەگەڵ بکات و ئازادی بکات.

لە لایەکی دیکەوە: هەر ئەمڕۆ سەندیکای ڕۆژنامەنوسان، لە بەیاننامەیەکدا ئیدانەی دەستگیرکردنی ئەو ڕۆژنامەنووسەی کرد و ڕایگەیاندووە، دەستگیرکردنی رۆژنامەنووس بەشدار بازیانی لەلایەن ئاسایشی سلێمانی، بەبێ ئاگاداری پێشوەختەو بەبێ بڕیاری دادگا پێشێلکردنی یاسای کاری رۆژنامەوانییە و داوای ئازادکردنی دەکەین.