سووریا و وڵاتانی دراوسێی: ئاسایشی دیمەشق بنەمای ئاسایشی ناوچەکەیە

ئاڤا نیوز

 

کۆبوونەوەی سووریا و وڵاتانی دراوسێی لە عەممان بە دەرکردنی چەند ڕاسپاردەیەک کۆتاییهات و تیایدا جەختکرایەوە کە ئاسایشی دیمەشق بنەمای ئاسایشی ناوچەکەیە، بۆ ڕووبەڕووبوونەوەی مەترسییەکانی داعشیش بڕیاردرا ناوەندێکی هاوبەشی هەماهەنگی دابمەزرێنرێت.

 

چیرۆکی سەرەکی: پەیوەست بە پێشهاتەکانی سووریا دوای ڕووخانی دەسەڵاتەکەی ئەسەد، ڕۆژی یەکشەممە لە عەممان کۆبوونەوەی وەزیرانی دەرەوە، بەرگریی و هەواڵگریی سووریا، عێراق، ئوردن، لوبنان و تورکیا بەڕێوەچوو.

 

ڕاگەیێنراوی فەرمی: دوای کۆتاییهاتنی کۆبوونەوەکە هەر پێنج وڵاتەکە ڕاگەیێنراوێکی هاوبەشیان بڵاوکردەوە و تیایدا جەختیان کردەوە کە پشتیوانی گەلی سووریا دەبن بۆ دووبارە بونیادنانەوەی وڵاتەکە و پاراستنی ئاسایش و سەقامگیرییەکەی، هاوکات پشتیوانی خۆشیان بۆ پاراستنی مافی هەموو سوورییەکان دووپاتکردەوە.

 

بەشێکی دیکە لە ڕاگەیێنراوەکە:

 

- ڕێکاری هاوبەش بۆ ڕووبەڕووبوونەوەی تیرۆر و بازرگانانی ماددەی هۆشبەر و چەک تاوتوێ کرا.

- دەستدرێژیی و فراوانخوازییەکانی ئیسرائیل بۆ ناوخاکی سووریا سەرکۆنە دەکەین و داوای جوڵەی نێودەوڵەتیی دەکەین بۆ پابەندکردنی ئیسرائیل بە کشانەوەی لە سووریا.

- ناوەندێکی هاوبەشی هەماهەنگی بۆ ڕووبەڕوبوونەوەی داعش دادەمەزرێنین، بۆ پشتیوانی هەوڵە هەرێمی و نێودەوڵەتییەکان بەجۆرێک لە دەرئەنجامدا ببێتە هۆی لەناوبردنی ئەو ڕێکخراوە کە هەڕەشەیە لەسەر ئاسایشی سووریا و جیهان، لەگەڵ مامەڵەکردن لەگەڵ زیندانەکانی داعش.

- پێشوازی لە دەرئەنجامەکانی کۆنگرەی گفتوگۆی نیشتیمانی سووریا و هەوڵە نێودەوڵەتییەکان بۆ ئاوەدانکردنەوەی ئەو وڵاتە دەکەین، بەپێویستی دەزانین سزاکانی سەر سووریا لاببرێن.

- مانگی داهاتوو لە تورکیا دووەم کۆبوونەوەی هەر پێنج وڵاتەکە بەڕێوەدەچێت و لەسەر هەندێکی پرسی دیکە بڕیاری پێویست دەدرێت.