مەسرور بارزانی: کەرکووک داگیرکراوە و دەستبەرداری بستێک خاکی کوردستان نابین

ئاڤا نیوز

سەرۆکوەزیران مەسرور بارزانی جارێکی دیکە پشتیوانی بۆ جووتیارانی کوردی سنووری کەرکووک و ماددەی 140 دووپات کردەوە، ڕاشیگەیاند  ئەمانە ناوچەی دابڕاو و ناکۆکی لەسەر نین، بەڵکو ناوچەی داگیر کراون، دەبێت ڕۆژێک هەر بێت بگەڕێنەوە سەر کوردستان، بەڵام ئەمانەوێت بە ئاشتیانە کێشەکان چارەسەر بکەین.

چیرۆکی سەرەکی: مەسروور بارزانی، سەرۆکوەزیرانی هەرێمی کوردستان، کە یەکەم بەرپرسی کورد بوو لەکاتی پەلاماردانی جووتیاران لەلایەن سوپای عێراقەوە بە دەنگیانەوە چوو، لەبیری نەکردن، ئەمڕۆ سەردانی میحوەری ڕۆژئاوای كەركووكی پێشمەرگەی کرد و لەوێ بەربانگی لەگەڵ جووتیاران و پێشمەرگەکانی میحوەرەکە کردەوە. سوپاسی ماندووبون و قوربانیدانی پێشمەرگەشی کرد.

لێدوانی فەرمی: سەرۆکوەزیران مەسرور بارزانی پێش شکاندنی ڕۆژوو وتارێکی پێشکەش کرد، ڕووی لە جووتیاران کرد و وتی: 

٠ هاتووم بۆ لاتان تاوەکو جارێکی دیکە پشتیوانی خۆمتان بۆ دووپات بکەمەوە. بەردوامین لە هەوڵەکانمان بۆ چارەسەرکردنی کێشەکانی ئەم ناوچەیە لەگەڵ حکومەتی عێراق و لە بستێک خاکی کوردستان خۆش نابین". 

٠ کەرکووک و تەواوی ناوچەکانی سنووری ماددەی 140ی دەستووری عێراق ناوچەی دابڕاو و ناکۆکی لەسەر نین، ئەمانە ناوچەی داگیر کراون و بە هەڵە دەگوترێت ناوچە كێشەلەسەرەكان، کەرکووک دڵی کوردستانە و دەبێت ڕۆژێک هەر بگەڕێتەوە سەر کوردستان، بەڵام دەمانەوێت کێشەکان بە ئاشتانە چارەسەر بکرێن.

٠ لەدوای نووسینەوەی دەستوور لە 2005، دەبووایە ئەم کێشانە چارەسەر بکرێن بەڵام نەکرا، پێویستە بە دەستوور کێشەکان چارەسەر بکەین و بەردەوامین لە گفتوگۆکردن لەگەڵ بەغدا بۆ چارەسەرکردنی ئەو کێشانە.

٠ ماندووبووین لە تووندوتیژی، لە شەڕکردن، بەڵام یەک هەڵوێستی و ئیرادەی بەهێزی خەڵکەکەمان دەتوانێت وابکات بتوانین نەوەک هەر ماددەی ماددەی 140 جێبەجێ بکەین، بەڵکو هەموو بەندەکانی دەستووریش وەک ئەوەی هاتووە، بەو شێوەیە جێبەجێ بکرێن.